Қозоғистон нефти рекорд даражада арзонлашди

Каспий қувур консорциуми (КҚК) орқали экспорт қилинадиган Қозоғистоннинг CPC Blend туридаги нефти ташқи бозорларда бир баррель учун 5 долларгача чегирма билан сотилмоқда. Бу 2022 йил охиридан буён энг ёмон кўрсаткич ҳисобланади. Бу ҳақда “Reuters” хабар берди. 

Маълум қилинишича, CPC Blend нефтининг жозибадор нархи унга бўлган талабнинг ошишига сабаб бўлган, шунинг учун паст нархлар узоқ сақланиб қолмаган. Нархларнинг пасайиши асосан Қозоғистон нефтининг асосий харидорлари етказиб беришдаги узилишлардан хавотир олиб, вақтинча бошқа нефть турларига ўтиб кетгани билан боғлиқ.

Сўнгги ойларда КҚК орқали Қозоғистон нефтини жўнатиш бир неча бор тўхтатилган. Бунга Украина дронларининг ҳужумлари, ноқулай об-ҳаво, юклаш терминалидаги таъмирлаш ишлари ҳамда январь ойида Тенгиз конидаги генератор ёнғини ортидан ишлаб чиқаришнинг қисқариши сабаб бўлган. 

“Reuters” маълумотига кўра, февраль ойида Тенгиз конидан нефть экспорти режанинг атиги 35 фоизини ташкил этиши мумкин. Бу эса Энергетика вазири Эрлан Аккенженовнинг ойнинг бошига келиб ишлаб чиқариш тўлиқ тикланиши ҳақидаги аввалги баёнотларига зид. Январь ойида эса умумий экспорт ҳажми режанинг қарийб ярмига тенг бўлган.

КҚК орқали етказиб беришдаги узилишлар сабаб январь ойида Кашаган конидан олинган нефтнинг бир қисми илк бор ички бозорга йўналтирилган. Одатда Қозоғистон нефть экспортининг 80 фоизи КҚК ҳиссасига тўғри келади. Қувурга Тенгиз, Кашаган ва Карачаганак конларидан хомашё келиб тушади.  

Эслатиб ўтамиз, аввалроқ Қозоғистон нефтини ташувчи танкерлар ҳужумга учрагани ҳақида хабар берилган эди.

Эъзоза Олимова