“Қўрқоқлар”. Трамп НАТОни таҳқирлаб, унга таҳдид қилди (видео)

АҚШ Президенти Дональд Трамп НАТОдан чиқиш масаласини жиддий кўриб чиқаётганини маълум қилди. У бу фикрни бугун, 2 апрель куни Эрон уруши бўйича халққа йўллаган мурожаатида айтиб ўтди.

Трампга кўра, НАТО давлатлари Эрон билан урушда АҚШни қўллаб-қувватламаган. У альянсни “қоғоз йўлбарслар” деб атаб, ҳатто Владимир Путин ҳам буни билишини таъкидлаган. Унинг фикрича, иттифоқчилар АҚШга автоматик равишда ёрдам бериши керак эди, чунки АҚШ илгари бошқа давлатларни, жумладан Украинани қўллаб-қувватлаган.

Трамп, шунингдек, агар НАТО давлатлари Ҳормуз бўғозини очиш операциясида иштирок этмаса, альянсни “жуда ёмон келажак” кутаётганини айтган.

Маълумотларга кўра, АҚШ иттифоқчилардан Ҳормуз бўғозига ҳарбий кемалар юборишни сўраган, бироқ Германия, Франция, Италия ва Испания бунга рози бўлмаган. Германия канцлери Фридрих Мерц НАТО мудофаа иттифоқи эканини, ҳужум операцияларида қатнашмаслигини билдирган.

Буюк Британия ёрдам масаласини ўрганиб чиқишини айтган бўлса, Франция ва Италия Эрон билан бевосита келишув орқали ўз кемаларининг ўтишини таъминлашни афзал кўрган. Кейинчалик Швеция ҳам бу ташаббусни рад этган.

Шундан сўнг Трамп АҚШ энди операцияда қатнашишни истамаган давлатларга ёрдам бермаслигини билдириб, уларни “қўрқоқ” деб атаган. АҚШ Давлат котиби Марко Рубио эса Эрон билан уруш тугагач, НАТОнинг аҳамиятини қайта баҳолаш кераклигини айтган.

Эслатиб ўтамиз, аввалроқ АҚШ Президенти Дональд Трамп мурожаатида Эрон билан ҳарбий операция деярли барча мақсадларга эришгани ва яна 2–3 ҳафта давом этишини маълум қилганди. Президентнинг таъкидлашича, Эрон аллақачон ўзининг флотидан ва ҳарбий-ҳаво кучларидан деярли маҳрум бўлган.