Хитой АҚШга кескин норозилик билдирди

Xитой Ташқи ишлар вазирлиги вакили Линь Цзянь АҚШда Хитой компаниялари ходимларининг асоссиз ҳибсга олиниши ва сўроқ қилинишига қарши кескин норозилик билдирди. Бу ҳақда у бугун, 2 февраль куни ўтказилган маутбуот анжуманида сўз очди. 

Дипломатнинг сўзларига кўра, АҚШ ҳуқуқни муҳофаза қилиш идоралари яқинда Хитой компаниялари ходимларини узоқ ва асоссиз сўроқ қилиш, ҳибсга олиш ва депортация қилиш билан шуғулланган. 

“Хитой бу борада қатъий норозилик билдиришини маълум қиламиз”, деган Линь Цзянь.

У Америка ҳуқуқ-тартибот идораларини Хитой фуқароларининг қонуний ҳуқуқларини бузишда ва икки мамлакат ўртасидаги бизнес муҳитига путур етказишда айблаган. Линь Цзянь Вашингтонни бундай ҳаракатларни дарҳол тўхтатишга чақирган. Шунингдек, Пекин ўз фуқароларини ҳимоя қилиш учун барча зарур чораларни кўришда давом этиши ҳақида огоҳлантирган. 

Бунгача Хитой Ташқи ишлар вазирлиги вакили Мао Нин АҚШ Эрон билан ҳамкорликка 25 фоизли божлар жорий этса, Пекин ўз манфаатларини қатъий ҳимоя қилиш ниятида эканлигини айтган эди. Дипломат Хитой бундай масалаларда аниқ ва қатъий позицияни сақлаб қолишини таъкидлаган.

Эслатиб ўтамиз, аввалроқ Хитой АҚШни Тайвань билан расмий мулоқотларни зудлик билан тўхтатишга ва орол мустақиллигига интилаётган “сепаратистик кучлар”га ҳар қандай нотўғри сигнал юборишдан тийилишга қатъий чақирганди.