Колизейдаги махфий йўлак 2000 йил ичида илк бор очилди

Милодий 180-192 йилларда ҳукмронлик қилган Рим императори Коммод номи билан аталувчи, илгари махфий бўлган йўлак жорий йилнинг 9 октябрь куни илк бор жамоатчилик учун очилди. Бу ҳақда “Reuters” хабар берди.

Нашрнинг ёзишича, бу йўлак императорларга халқ орасига аралашмасдан гладиаторлар жанги ва бошқа томошаларни бевосита аренадан томоша қилиш имконини берган. Маълумотларга кўра, у Колизейнинг пойдевор қисмида милодий I аср охири – II аср бошларида, дастлабки лойиҳага қўшимча тарзда қазилган. Колизейнинг ўзи эса милодий 80 йилда очилган.

Археолог Барбара Наццаро “Reuters”га берган интервьюсида “Коммод йўлаги” биринчи марта омма учун очилганини айтиб, “энди ташриф буюрувчилар император бўлиш қандай туйғу эканини ҳис этиши мумкин,” деган.

Йўлак XIX асрда топилган. “Associated Press” маълумотига кўра, у император Коммод номи билан боғланади, чунки тарихий манбаларда ёзилишича, у айнан шу ерости йўлагида унга қарши уюштирилган суиқасддан омон қолган.

Йўлакнинг кириш қисмида археологлар саҳна томошалари билан бевосита боғлиқ бўлган безак элементлари – ёввойи чўчқа овлари, айиқ жанглари ва акробатик чиқишларни тасвирловчи тасвирий бўлакларни топган. Мутахассисларнинг фикрича, бу бадиий безаклар томошабинларни йўлакдан кейин кутаётган шафқатсиз ўйинларга кириш сўзи сифатида ишлатилган.

Эслатиб ўтамиз, аввалроқ Мисрда 20 йил давом этган реставрация ишлари якунланиб, фиръавн Аменхотеп III нинг мақбараси илк бор сайёҳлар учун очилгани ҳақида хабар берилган эди.