Лукашенко 100 дан ортиқ сиёсий маҳбусни озод қилди (видео)

Александр Лукашенко Беларусда 2020 йилги президентлик сайловларидаги собиқ номзод Виктор Бабарико, унинг сайлов штаби раҳбари Мария Колесникова ҳамда Нобель мукофоти совриндори, ҳуқуқ ҳимоячиси Алесь Беляцкий билан бирга юздан ортиқ сиёсий маҳбусни озод қилди. Бу ҳақда Лукашенконинг матбуот хизматига таяниб, “Зеркало” нашри хабар берди.

Маълум бўлишича, бу қарор АҚШ 2021 йилда жорий этилган Беларусь калийсига нисбатан санкцияларни бекор қилганини эълон қилганидан сўнг қабул қилинган. Беларусь резидентининг қарорига кўра, жосуслик, террорчилик ва экстремистик фаолиятда айбланиб судланган турли давлатлар фуқароларидан иборат 123 киши афв этилган. Лукашенко администрацияси маълумотига кўра, бу “АҚШ Президенти Дональд Трамп билан эришилган келишувлар доирасида ва унинг илтимосига биноан” амалга оширилган.

Расмийларга кўра, бу қадам Беларусь Республикасининг ҳамкор давлатлар билан муносабатларида ижобий динамикани тезлаштириш, шунингдек, Европа қитъасидаги вазиятни барқарорлаштириш мақсадида ташланган. Озод этилган 114 киши Украинага олиб чиқилган.

Колесникованинг яқинлари у яхши кўринишда эканини ва ўзини яхши ҳис қилаётганини айтган. Тинчлик бўйича Нобель мукофоти лауреати Беляцкий озод этилгач, мажбуран мамлакатдан депортация қилинган. Сургунда бўлган Беларусь мухолифати етакчиси Светлана Тихановскаянинг маслаҳатчисига кўра, барча озод этилганлар мамлакат ҳудудини тарк этган ва ҳозирда хавфсиз жойда.

ОАВ ва ҳуқуқ ҳимоячиларига кўра, озод этилганлар рўйхатига сиёсий маҳбуслар Илья Князев, Александр Федута ва Вячеслав Папсо, юрист Максим Знак, ҳуқуқ ҳимоячилар Валентин Стефанович ва Владимир Лабкович, шунингдек, бошқа беларусликлар ва хорижий фуқаролар ҳам кирган.

Эслатиб ўтамиз, аввалроқ Бишкек шаҳридаги КХШТ саммитида Беларусь фуқароси Александр Лукашенко журналистлар билан суҳбатда Қирғизистоннинг ҳокимиятдан ағдарилган раҳбари Қурманбек Бакиевнинг Минскдаги ҳаёти ҳақида гапириб, уни Қирғизистоннинг қочқиндаги президентини бермаслигини айтганди.