Мьянма етакчиси вафот этди

2021 йилдаги ҳарбий тўнтариш ортидан ҳокимиятга келган Мьянма президенти вазифасини бажарувчи Мьин Шве 74 ёшида вафот этди. Бу ҳақда “Reuters” хабар берди. 

Маълум бўлишича, сиёсатчи бугун, 7 август куни эрталаб пойтахт Нейпьидо шаҳридаги шифохонада ҳаётдан кўз юмган. Ўтган йилнинг июлида у соғлиғи туфайли таътилга чиққан ва ўшандан бери давлат раҳбарининг асосий ваколатларини ҳарбий хунта етакчиси, Қуролли кучлар Бош қўмондони Мин Аун Хлайн бажариб келаётганди.

2023 йил бошидан бери Мьин Шве мустақил ҳаракатлана олмасди ва овқат истеъмол қилишда қийналарди. “Eleven Myanmar” нашрининг ёзишича, тиббий текширувлар у Паркинсон касаллиги ва бошқа асаб тизими бузилишларидан азият чекаётганини кўрсатган. Вафотидан олдин Миллий мудофаа ва хавфсизлик кенгаши вакили генерал-майор Зо Мин Тун унинг аҳволи оғир эканини билдирган.

Собиқ генерал-лейтенант бўлган Мьин Шве 2021 йил 1 февралда вақтинчалик президент этиб тайинланган эди. Ҳарбийлар ўшанда президент Вин Мьин, давлат маслаҳатчиси Аун Сан Су Жи ва ҳукмрон “Миллий демократ лига” партиясининг бошқа етакчиларини ҳибсга олган ва мамлакатда фавқулодда ҳолат эълон қилган. Хунта мухолифат, жумладан, демократ фаоллар ва этник озчиликлар милициялари билан тўқнашувлар туфайли фавқулодда ҳолатни бир неча бор узайтирди. У охир-оқибат жорий йилнинг июль ойи охирида бекор қилинди.

Мьин Шве номигагина конституциявий орган бўлган, амалда эса ҳарбийлар томонидан бошқариладиган Миллий мудофаа ва хавфсизлик кенгашига раислик қилган. Унинг ваколатлари асосан рамзий бўлиб, фавқулодда ҳолатни узайтириш ҳақидаги фармонларни имзолаш каби вазифаларни бажарган. Амалдаги ҳукумат фаолиятини эса бош вазир этиб тайинланган Мин Аун Хлайн назорат қилган. Уларнинг иккаласи ҳам АҚШ санкциялари остида бўлиб, АҚШ Молия вазирлиги Мьин Швени “демократик йўл билан сайланган ҳукуматни ағдаришда муҳим роль ўйнаган” шахс сифатида таърифлаган.

Тўнтаришдан олдин Мьин Шве Мьянма вице-президенти бўлган. 2011-2016 йилларда эса Янгон провинциясининг бош вазири лавозимида ишлаган. 2007 йилда буддист роҳиблар бошчилигидаги ҳукуматга қарши норозиликларни бостиришда иштирок этган. Бу воқеаларда ўнлаб одамлар ҳалок бўлган, юзлаб кишилар ҳибсга олинган.

Эслатиб ўтамиз, аввалроқ Руминиянинг биринчи президенти Ион Илиеску шифохонада деярли икки ой ётганидан сўнг 95 ёшида вафот этганди.