Макрон Ҳормузда хавфсизликни таъминлашга тайёрлигини айтди

Париж Ҳормуз бўғозида кемаларнинг хавфсиз ҳаракатланишини таъминлашда ёрдам беришга тайёр. Бу ҳақда бугун, 11 апрель куни Франция Президенти Эммануэль Макрон эронлик ҳамкасби Масъуд Пезешкиён билан телефон орқали бўлган мулоқоти чоғида маълум қилди. 

Франция етакчиси суҳбат тафсилотларини ўзининг X ижтимоий тармоғидаги саҳифасида келтириб ўтган. Макрон Пезешкиённи Покистон пойтахти Исломободда бошланган музокаралар тақдим этаётган имкониятдан фойдаланишга чақирган. Бу, унинг фикрича, вазиятни барқарор юмшатиш (деэскалация) ва барча жалб қилинган давлатлар учун минтақада ишончли хавфсизлик кафолатларини таъминлайдиган келишувга йўл очади.

“Мен Эрон томонидан Ҳормуз бўғозида кемалар қатнови эркинлиги ва хавфсизлигини тезроқ тиклаш зарурлигини таъкидладим, Франция бу жараёнда кўмаклашишга тайёр”, дейди Франция Президенти.

Бундан ташқари, француз етакчиси ўт очишни тўхтатиш режимига, жумладан, Ливанда ҳам тўлиқ амал қилиш муҳимлигини қайд этган.

Эслатиб ўтамиз, аввалроқ АҚШ Ҳормуз бўғозини очиш шарти билан Эрон активларини блокдан чиқаришга рози бўлгани ҳақида хабар берилган эди.