Мексикада 14 кун сув босган конда яшаган эркак омон қолди

Кеча, 8 апрель куни Мексика ҳавфсизлик кучлари ғаввослари мамлакатнинг шимолий қисмида жойлашган Синалоа штатидаги олтин конида 2 ҳафта қолиб кетган Франсиско Сапата Нахерани қутқариб олди. Бу ҳақда BBC хабар берди.

Қайд этилишича, жорий йилнинг 25 март куни Синалоадаги олтин конида чиқиндилар сақланадиган тўғон ёрилиши ортидан бахтсиз ҳодиса келиб чиққан. Тўғон ёрилганда кон ичида 25 нафар кончи бўлган. Улардан 21 нафари ғордан чиқишга эришган. Қолган 4 нафари эса кон ичида қамалиб қолган. Шу жумладан, 42 ёшли кончи Франсиско Сапата ҳам ахлат ва сув остидаги қоронғу ғорда – 300 метр чуқурликда 14 кун давомида жон сақлаб қолган.

Кеча, 8 апрель куни 300 соатдан ортиқ давом этган қидирувдан сўнг ғаввослар ниҳоят Сапата ўз жойлашуви ҳақида огоҳлантириш учун ёқиб-ўчирган машъала чироғининг милтиллашини пайқаган ва уни қутқариб олган.

Қутқарув жараёнидан эълон қилинган видеода кончининг белигача сувга ботганини, қутқарувчиларга у ҳеч қачон улардан умидини узмагани ва ишончини йўқотмаганини айтганини кўриш мумкин.

У турган жойга олиб борувчи туннель сув остида қолгани сабабли ғаввослар уни дарҳол чиқариб ололмаган. Шу туфайли, қутқарув жараёни 20 соат давом этган. Қутқарувчилар сув босган туннеллардаги сув сатҳини пасайтириш учун насослардан фойдаланганидан сўнг ниҳоят Сапата ёруғликка чиқарилган. 

Унинг қоронғу ва зах босган чуқурликда қандай қилиб 2 ҳафта давомида омон қолгани ҳали очиқланмаган. Қолаверса, ғаввослар фожиадан 5 кун ўтиб яна бир маҳаллий кончи Хосе Александро ҳам қутқариб қолишга эришган. Шунга қарамай, фожиа оқибатида бир кончининг жасади топилган. Сўнгги кончини қидириш ишлари ҳанузгача давом этмоқда.

Эслатиб ўтамиз, аввалроқ Камчаткада икки ой денгизда қолиб кетган эркак қутқарилгани ҳақида хабар берилган эди.

Ҳожиакбар Муҳаммаджонов