Роналду сабаб Португалия ўйини учун чипта нархлари пасайиб кетди

Португалия терма жамоасининг Мексикага қарши ўртоқлик учрашуви учун чипталар нархи Криштиану Роналдунинг ўйинда иштирок этмаслиги сабаб кескин пасайиб кетди. Бу ҳақда “El Pais” хабар берди.

Учрашув Мексика шаҳридаги янгиланган “Ацтека” стадионида ўтказилиши режалаштирилган. Мазкур ўйин дастлаб катта қизиқиш уйғотган эди, чунки асосий эътибор айнан Роналдуга қаратилганди. Бироқ Португалия терма жамоаси бош мураббийи Роберто Мартинес футболчини жароҳати сабаб таркибга киритмади. Шу қарор мухлислар ва чипталарни қиммат нархда сотиб олганлар орасида норозиликка сабаб бўлди.

Дастлаб чипталар савдоси юқори талаб туфайли муаммолар юзага келган эди. Расмий савдо ҳамкори бўлган платформа орқали сотувлар бошлангач, кўплаб мухлислар тизимдаги носозликлар ва сунъий навбатлардан шикоят қилган. Шу билан бирга, иккиламчи бозорда чипталар нархи 500 долларгача кўтарилиб кетган.

Бироқ Роналдунинг ўйнамаслиги маълум бўлгач, вазият кескин ўзгарди. Қайта сотув бозорида чипталар нархи тушиб кетди. Ҳозирда айрим платформаларда энг арзон чипталар 146 доллар атрофида таклиф қилинмоқда.

Айрим манбаларга кўра, Португалия футбол федерацияси Роналдунинг жароҳати сабаб миллион евро миқдоридаги бонусдан маҳрум бўлади.

Маълумот учун, Португалия жорий йилнинг 28 март куни Мексикага ва 31 март куни АҚШга қарши ўртоқлик учрашувларини ўтказиши режалаштирган. 

Эслатиб ўтамиз, Роналду етакчилигидаги Португалия терма жамоаси Жаҳон чемпионатида Ўзбекистон билан бирга “К” гуруҳидан ўрин олган.