Milliarder Bill Geyts Epshteyn ishi bo‘yicha ko‘rsatma berdi

Bill Geyts Kongressdagi ko‘rsatmasida Jeffri Epshteyn uni nikohdan tashqari munosabatlari haqidagi ma’lumotlar orqali bosim ostiga olganini bildirdi. Bu haqda “Reuters” xabar berdi.
 
Microsoft korporatsiyasi asoschilaridan biri Bill Geyts kecha, 10 iyun kuni AQSH Kongressi a’zolariga bergan ko‘rsatmasida jinsiy jinoyatlarda ayblangan Jeffri Epshteyn bilan hamkorlik qilgan paytda uning jinoyatlari ko‘lamini to‘liq tushunmaganini aytgan.
Geyts, shuningdek, Epshteyn tomonidan sodir etilgan biror jinoiy harakatga shaxsan guvoh bo‘lmaganini ma’lum qilgan. Uning aytishicha, Epshteyn nikohdan tashqari munosabatlari haqidagi ma’lumotlardan foydalanib, unga bosim o‘tkazgan.

“Bu munosabatlarning Epshteyn bilan bo‘lgan aloqalarimga hech qanday bog‘liqligi yo‘q edi, ammo ular oilam uchun og‘ir kechdi. Epshteyn mening xiyonatlarim haqidagi ma’lumotlardan, shuningdek, ularga qo‘shimcha qilib tarqatgan ko‘plab yolg‘onlardan foydalanib, meni u bilan yana hamkorlik qilishga majburlashga uringan”, degan Geyts o‘z bayonotida.

Kongress hozirda AQSH Adliya vazirligining Epshteyn ishini qanday yuritganini tekshirmoqda. Milliarderning ko‘rsatmalari ayollar va qizlarni og‘ir ijtimoiy sharoitlardan o‘z domiga tortib kelgan Epshteyn bilan bo‘lgan aloqalariga bag‘ishlangan.

Qayd etilishicha, Bill Geyts Vakolatlar va davlat islohotlari bo‘yicha Quyi palata qo‘mitasiga yopiq eshiklar ortida ko‘rsatma bergan. Qo‘mita Epshteyn va uning sherigi Gisleyn Maksvellga qarshi ishlar hamda ular bilan bog‘liq masalalarda federal darajadagi ehtimoliy boshqaruv xatolarini tekshirmoqda.
 
Qo‘mita raisi, respublikachi kongressmen Jeyms Komer mart oyida Geytsga shaxsan kelib ko‘rsatma berishni talab qilgani haqida maktub yuborgan. “The New York Times” gazetasining yozishicha, Geyts qo‘mitaning sobiq bosh tergovchisi Jeyk Grinbergni o‘z chiqishiga tayyorgarlik ko‘rishi uchun yollagan.
 
Ma’lumot o‘rnida, Jeffri Epshteyn 2008 yilda Florida shtatidagi fohishalik bilan bog‘liq jinoyat ishi bo‘yicha aybini tan olgan va 13 oy qamoq jazosini o‘tagan. 2019 yilda federal prokurorlar uni voyaga yetmaganlarni jinsiy ekspluatatsiya qilishda ayblagan. Epshteyn bu ayblovlarni rad etgan, ammo o‘sha yilning o‘zida sud boshlanishidan oldin qamoqxonada o‘z joniga qasd qilgani rasman ma’lum qilingan.
 
Joriy yilda AQSH Adliya vazirligi tomonidan e’lon qilingan hujjatlarga ko‘ra, Geyts va Epshteyn 2008 yildagi qamoq jazosidan keyin bir necha bor uchrashib, milliarderning xayriya faoliyatini kengaytirish masalalarini muhokama qilgan. Hujjatlar orasida Geytsning yuzlari yashirilgan ayollar bilan tushgan suratlari ham bor. Geyts avval ham Epshteyn bilan munosabatlari faqat xayriya ishlari bilan cheklanganini aytgan va u bilan uchrashgani xato bo‘lganini tan olgan.
 
Geyts jamg‘armasi vakili “Reuters” agentligiga fevral oyida o‘tkazilgan yig‘ilishda milliarder “o‘z harakatlari uchun mas’uliyatni zimmasiga olganini” bildirgan.
 
Geytsning Epshteyn bilan munosabatlari Geyts jamg‘armasini ham tekshiruvlar markaziga olib keldi. Jamg‘arma aprel oyida pedofil moliyachining tashkilot bilan aloqalarini tashqi audit orqali tekshirishni boshlaganini ma’lum qilgan. Adliya vazirligi yanvar oyida e’lon qilgan elektron xatlarda Epshteyn va Geyts jamg‘armasi xodimlari o‘rtasidagi muloqotlar ham mavjud bo‘lgan.
 
Quyi palata qo‘mitasining tergovi huquqni muhofaza qiluvchi organlarning tekshiruv va sud ishlarini qanday olib borgani, kelishuvlar, Epshteynning o‘limi, odam savdosiga qarshi kurashdagi kamchiliklar, etika bilan bog‘liq muammolar va hukumat hujjatlarini oshkor qilishdagi kechikishlarni qamrab olgan.
 
Adliya vazirligi tomonidan millionlab ichki hujjatlarning e’lon qilinishi Epshteynning siyosat, moliya, ilm-fan va biznes sohalaridagi ko‘plab mashhur shaxslar bilan aloqalarini ochib bergan. Ular orasida 1990 va 2000 yillarda Epshteyn bilan yaqin muloqotda bo‘lgan AQSH Prezidenti Donald Tramp ham bor.
 
Aprel oyida Donald Tramp tomonidan lavozimidan ozod qilingan sobiq bosh prokuror Pem Bondi mazkur ishni yuritish tarzi uchun qattiq tanqidlarga uchragan. Ayrim tanqidchilar uni Trampni jamoatchilik nazoratidan himoya qilishga uringanlikda ayblagan. Tramp uzoq vaqt davomida mazkur hujjatlarni e’lon qilishga qarshi chiqqan, ammo keyinchalik Kongress ularni oshkor qilishni talab qiluvchi qonunni ko‘pchilik ovoz bilan qabul qilishidan sal oldin bu qarorga rozilik bildirgandi.
 
Eslatib o‘tamiz, avvalroq amerikaliklarning aksariyati Donald Tramp ma’muriyati Jeffri Epshteyn bilan bog‘liq ishlar bo‘yicha adolatli choralar ko‘rilganiga ishonmasligini bildirgan edi.