Yosh qizlar qanday qilib Epshteynning changaliga tushgan?

Modellik skautlari dunyo bo‘ylab yangi chehralarni izlash jarayonida birin-ketin yo‘llagan elektron xatlarida o‘z yangiliklarini kutilmagan bir shaxs – ushbu sohada hech qanday rasmiy lavozimga ega bo‘lmagan, jinsiy jinoyatlarda ayblangan Jeffri Epshteyn bilan baham ko‘rgan. Bu haqda CNN xabar berdi.

Nashrning yozishicha, skautlardan biri modellikka nomzodlardan birini Epshteynga “siz bilan uchrashishdan xursand bo‘ladigan shiringina fransuz qizi” deya maqtagan va Skandinaviyadan bo‘lgan 16-17 yoshli potensial modellar guruhi “keyingi yilga tayyor bo‘lishini” aytgan. Boshqa bir rekruter esa “sayohatga tayyor” bo‘lgan 19 yoshli rossiyalik qizni tavsiya qilgan, yana biri esa yosh modelni “eng yaxshi qiz” deya ko‘klarga ko‘targan.

“U men sizga berishni rejalashtirib yurgan sovg‘am”, deb yozgan rekruter.

Obro‘sizlangan moliyachi bilan aloqada bo‘lganlar faqat ushbu professionallar bilangina cheklanib qolmagan. CNN AQSH Adliya vazirligi tomonidan e’lon qilingan ko‘plab hujjatlarni o‘rganib chiqib, Epshteyn va modellik industriyasi insayderlari, jumladan, agentlik rahbarlari, ma’murlar va rekruterlar o‘rtasidagi aloqalarning ko‘lamiga doir yangi tafsilotlarni aniqlagan.

Hujjatlar jinsiy jinoyatchi va dunyo miqyosidagi ushbu sohaning ayrim vakillari o‘rtasidagi o‘zaro manfaatli munosabatlarni ko‘rsatadi: Epshteyn pul, professional aloqalar va AQSH vizasini olishda yordam bergan, modellik sohasi xodimlari esa uni yosh, xorijlik ayollar bilan ta’minlagan – ularning aksariyati hozirda Epshteyn tomonidan jinsiy zo‘ravonlikka uchraganini aytmoqda.

Hatto Epshteyn 2008 yilda jinsiy jinoyatlarda aybdor deb topilganidan keyin ham, modellik sohasi insayderlari u bilan qo‘shma biznes loyihalarini boshlash yo‘llarini izlashda davom etgan, uni moda namoyishlariga taklif qilishgan va o‘z kompaniyalari bilan hamkorlik qilishiga ruxsat bergan. Bu esa Epshteynga u o‘lja sifatida nishonga olgan modellarning karerasini belgilab bera oladigan nufuzli rahbar qiyofasini taqdim etgan.

CNN ko‘rib chiqqan elektron xatlar shuni ko‘rsatadiki, sohaning kamida olti nafar taniqli vakili ro‘yxatda turgan jinsiy jinoyatchini yosh modellar bilan bog‘lashga qayta-qayta uringan. Ularning ayrim xabarlarida jinsiy ishoralar mavjud bo‘lsa, boshqalari oddiy kasbiy tavsiyalardek ko‘ringan. Hujjatlar, shuningdek, ko‘plab boshqa insayderlar ham Epshteyn bilan do‘stona yozishmalar olib borganini ko‘rsatadi.

Epshteynning ayrim sheriklariga nisbatan jinoiy ayblovlar qo‘yilgan, ular orasida moliyachining taniqli qurbonlaridan biri tomonidan zo‘ravonlikda ayblangan fransiyalik modellik agenti Jan-Lyuk Bryunel ham bor. Bryunel 2008 yilda voyaga yetmaganlarni zo‘rlaganlik aybi bilan hibsga olinganidan keyin, 2022 yilda Parij qamoqxonasida o‘z joniga qasd qilgan. U ayblovlarni rad etgan.

Adliya vazirligi hujjatlarida nomlari keltirilgan boshqa modellik insayderlari hech qanday qonunbuzarlikda ayblanmagan va ular Epshteynning jinoyatlaridan bexabar bo‘lganliklarini da’vo qilgan. Ko‘pchilik Epshteynni moda olamida qonuniy va nufuzli shaxs deb bilganini, bunga uning Victoria’s Secret brendining sobiq egasi bilan aloqalari sabab bo‘lganini aytgan.

Daniel Siad ismli professional modellar rekruteri Epshteynni bir nechta modellar bilan uchrashtirishni tashkillashtirib bergan – ulardan ikki nafari CNN’ga Epshteyn ularni zo‘rlaganini aytgan. Siad bergan intervyusida ushbu ayollarga zarar yetkazilayotganiga ishonish uchun unda hech qanday asos bo‘lmaganini ta’kidlagan. Siadning so‘zlariga ko‘ra, Epshteyn uni o‘z jinoyatlari uchun jazosini o‘tab bo‘lganiga va u tavsiya qilgan “hech bir inson bilan bunday holat takrorlanmasligiga” ishontirgan.

“Men unga tanishtirgan va keyinchalik yonimga qaytib, yomon vaziyatga tushib qolganini aytgan birorta ham odamdan bunday gap eshitmaganman. Men bu odamni professional shaxs deb hisoblagandim”, deydi Siad.

Biroq Adliya vazirligi hujjatlari Siad Epshteynga yosh ayollarni shunchaki modellik imkoniyatlari uchun tavsiya qilmaganini ko‘rsatmoqda. 2018 yildagi xabarlardan birida u Epshteyn uchun “kelishgan yosh yordamchi qiz” qidirayotganini yozgan. Shuningdek, u o‘z sayohatlari davomida uchratgan yosh ayollarning suratlarini, jumladan, ularning ba’zi behayo suratlarini ham Epshteynga muntazam ravishda yuborib turgan.

Siadning bugungi kunda fikr bildirishicha, Epshteyn uni aldagan “xameleon” bo‘lgan. U Epshteyn o‘ziga kasting direktori sifatida tanishtirilganini va Epshteyn undan alohida tarzda yordamchi topishda ko‘mak so‘raganini bildirgan.

Epshteynning ushbu soha bilan aloqalari hozirda qonun chiqaruvchilar va huquqni muhofaza qilish organlari, jumladan, Parij bosh prokurorining so‘zlariga ko‘ra, joriy yilda Parijda boshlangan va Siadga tegishli ma’lumotlarni o‘rganayotgan jinoiy surishtiruvning bir qismi hisoblanadi. Ikki nafar sobiq model CNN’ga u yerdagi tergovchilarga Siad haqida ko‘rsatma berganliklarini ma’lum qilgan, Siadning o‘zi esa qonunbuzarlik qilganini rad etmoqda.

Eslatib o‘tamiz, avvalroq Bill Geyts Kongressdagi ko‘rsatmasida Jeffri Epshteyn uni nikohdan tashqari munosabatlari haqidagi ma’lumotlar orqali bosim ostiga olganini bildirgandi.