Мисрда Клеопатра даврига оид топилма аниқланди

Мисрда археологлар Клеопатра даврига оид чўккан портни топди. Бу ҳақда Миср Туризм ва археология ишлари вазирлигининг Facebook’даги саҳифасида хабар берилди. 

Унга кўра, бу топилма машҳур маликага оид қабртошни қидиришда ёрдам бериши мумкин. Доминикан археологик экспедицияси тош ва металл лангарлар, кўплаб қадимий амфоралар ҳамда ички порт қолдиқларини аниқлаган.

Шунингдек, тадқиқотчилар Тапосирис Магна ибодатхонасини денгиз билан боғлаб турган туннелларни ҳам топишга муваффақ бўлган. Экспедиция раҳбари доктор Кетлин Мартинеснинг айтишича, бу топилмалар Клеопатранинг севгилиси Марк Антоний билан бирга айнан шу ибодатхонада дафн этилган бўлиши эҳтимолини кучайтиради. 

Маълумот учун, Қадимги Миср маликаси Клеопатра эрамиздан аввалги 69 йилда туғилган, 18 ёшида тахтга ўтирган ва ҳокимиятни укаси Птолемей ХIII билан бўлишган. Аммо ёш ҳукмдорнинг маслаҳатчилари унинг номидан ҳокимиятни эгаллаб олишга уринганида, Клеопатра сургун қилинган. Кейинчалик у Юлий Сезарнинг эътиборини қозонган, унинг ўлимидан сўнг эса Клеопатра тақдирида Марк Антоний муҳим роль ўйнаган. Римликлар Мисрни босиб олганидан кейин Клеопатра ўз жонига қасд қилган ва севгилиси Марк Антоний ёнига дафн этилган. Аммо уларнинг қабри ҳануз топилмаган.

Эслатиб ўтамиз, аввалроқ Хитойнинг ғарбий қисмидаги Цингхай провинциясида милоддан аввалги 221–207 йиллар оралиғида ҳукмронлик қилган Цинь сулоласи даврига оид 2 200 йилдан ҳам қадимийроқ бўлган қоятош ёзуви топилганди.