“Нечта хотининг бор?” Трамп аш-Шарани сийлади (видео)

Жорий йилнинг 10 ноябрь куни АҚШ Президенти Дональд Трамп Оқ уйда бўлиб ўтган учрашув чоғида Сурия муваққат президенти Аҳмад аш-Шарага ўз номи остида ишлаб чиқарилган атирни совға қилди. Бу ҳақда NDTV хабар берди.

Ижтимоий тармоқларда Трамп ва аш-Шаранинг Оқ уйдаги видеоси тарқалиб, турли муҳокамаларга сабаб бўлди. Видеода атир номи айтилмаган бўлса-да, АҚШ етакчиси аш-Шарага узатаётган идиш Трамп бренди остида чиқарилган атирларнинг расмий сайтида жойлаштирилган “Victory 47” номли атир шишаси билан бир хил экани кўринади. Сайтдаги маълумотга кўра, бу атирнинг эркаклар ва аёллар учун мўлжалланган икки тури мавжуд бўлиб, ҳозирда у 249 долларга сотилмоқда.

Трамп аш-Шарага “биттасини ўзингизга, иккинчисини хотинингизга олинг”, деб таклиф қилган. Сўнг “Сизнинг нечта хотинингиз бор, бирми?” дея сўраган. Аш-Шара эса АҚШ Президентига “фақат бир нафар хотиним бор”, деб жавоб берган.

Эслатиб ўтамиз, Дональд Трамп Оқ уйда Аҳмад аш-Шара билан учрашгани ҳақида хабар берилганди. Учрашувдан сўнг, Трамп Сурия раҳбарини “кучли лидер” деб атаган. Трампнинг фикрича, аш-Шара Сурияни “жуда муваффақиятли” давлатга айлантира олади.

АҚШ жорий йилнинг 7 ноябрь куни аш-Шара Вашингтонга Трамп билан музокаралар ўтказиш учун ташриф буюриши арафасида унга нисбатан санкцияларни бекор қилганди. Бунга 6 ноябрда, БМТ Хавфсизлик Кенгашининг ҳам аш-Шарага нисбатан санкцияларни олиб ташлаш бўйича қарори сабаб бўлган.