Нетаньяху тирик. У хавфсизлик бўйича ёпиқ учрашув ўтказди (видео)

Бугун, 2 март куни Эрон томонидан Исроил ҳудудидаги ҳукумат объектларига уюштирилган навбатдаги ракета ҳужумларидан сўнг ҳалок бўлгани айтилаётган Исроил Бош вазири Биньямин Нетаньяху оммага кўриниш берди. Бу ҳақда “The Jerusalim Post” хабар берди.  

Нетаньяху собиқ бош вазир Нафтали Беннет ва мухолифат етакчиси Яир Лапид билан бирга Байт-Шемеш шаҳрида Исроил-АҚШ қўшма операцияси юзасидан хавфсизлик бўйича ёпиқ учрашув ўтказди. Улар Эронга қарши олиб борилаётган операцияни қўллаб-қувватлашини билдирган.

Бош вазир журналистларга берган интервьюсида операция қатъий давом этишини таъкидлаган. Унинг айтишича, бу кураш нафақат Исроил, балки бутун инсоният учун аҳамиятга эга. Шунингдек, у Эрон халқини зулмдан халос бўлиш куни яқинлашаётганини айтган.

“Эрон халқи зулм бўйинтуруғини ечиб юборадиган кун яқинлашмоқда. Бу инсоният учун кураш”, деган Нетаньяху.

Нафтали Беннет эса ҳар бир ҳарбий ҳаракат Эроннинг узоқ йиллар давомида шаклланган ҳарбий тизимини заифлаштиришга қаратилганини билдирган. У Исроил фуқароларини қатъиятли бўлишга, хавфсизлик қоидаларига риоя қилишга ва бирдамликни сақлашга чақирган.

Эслатиб ўтамиз, аввалроқ Эрон томонидан Исроил ҳудудидаги ҳукумат объектларига уюштирилган навбатдаги ракета ҳужумларидан сўнг Биньямин Нетаньяхунинг аҳволи номаълумлигича қолаётгани ҳақида хабар берилганди.