Нетаньяху Трампни Эронга яна зарба беришга кўндирмоқчи – WP

Исроил Бош вазири Биньямин Нетаньяху АҚШ Президенти Дональд Трамп билан бугун, 29 декабрь кечқурун бўладиган учрашувда Вашингтонни Эроннинг ракета объектларига зарба беришга рухсат беришга кўндиришга уриниб кўради. Бу ҳақда манбаларига таяниб, “The Washington Post” (WP) газетаси  хабар қилди.

Газета маълумотларига кўра, Нетаньяху Эронни ҳануз Исроил манфаатлари учун минтақавий таҳдид деб ҳисоблайди ва АҚШдан ёки Исроил армияси томонидан зарбаларга рухсат беришни, ёки Америка Қуролли кучларининг тўғридан тўғри аралашувини талаб қилмоқчи. Шунингдек, Исроил Бош вазири Трампни Ғазо сектори бўйича ҳам қаттиқроқ позиция эгаллашга кўндиришга ҳаракат қилади. У Трампнинг тинчлик режасининг иккинчи босқичида белгиланган ҳудудлардан Исроил қўшинлари чиқарилишидан олдин ҲАМАС ҳаракати бўлинмаларини куч билан қуролсизлантиришга кафолат олишни истайди.

WP таъкидлашича, Нетаньяху ўз мақсадларига эришиши эҳтимоли паст, чунки ҳозирда Америка Президенти Яқин Шарқда кескинликнинг яна кучайиб кетишидан қочишга ва ўз тинчликпарвар сиёсатини давом эттиришга интилмоқда.

13 июнга ўтар кечаси Исроил Эронга қарши ҳарбий операция бошлаган эди. Эрон бунга жавобан қарши ҳужум уюштирди. 22 июнь куни АҚШ можарога қўшилиб, Исфаҳон, Натанз ва Фордо шаҳарларидаги Эрон ядровий объектларига зарба берди. Эртаси куни Эрон Қатардаги Яқин Шарқдаги энг йирик Америка ҳарбий-ҳаво базаси – “Ал-Удейд”га ҳужум қилди. Шундан сўнг Трамп Исроил ва Эрон ўртасида ўт очишни тўхтатиш режимига келишилганини маълум қилди. Бу режим 24 июнь куни кучга кирди.