Нима қиляпсизлар, аҳмоқлар? – россиялик депутат Telegram чекловлари ҳақида

“Адолатли Россия” етакчиси Сергей Миронов мамлакатда Telegram’га қўйилган чекловларга қарши чиқди. Сиёсатчининг бу ҳақдаги видеоси унинг Telegram-каналида кеча, 11 февраль куни мессенжер секинлашганининг иккинчи кунида пайдо бўлди.

Депутат ўз чиқишида Telegram урушда қатнашаётганларнинг яқинлари билан ягона алоқа воситаси эканини айтган.

“Telegram’ни секинлаштираётганлар кимлар? Олдинга чиқинг, урушга боринг! У ерда қон тўкаётган йигитлар учун яқинлари билан боғланишнинг ягона воситаси бу. Нима қиляпсизлар, аҳмоқлар? Мен ҳар нарсани ўз номи билан айтяпман. Аҳмоқлар! Сиз нима қиляпсиз?!” деган у.

Шунингдек, Миронов Тelegram’да уруш учун маблағ йиғилаётгани, мессенжерда ҳарбийлар яқинлари билан мулоқот қилаётганини таъкидлаган.

“Ҳа, Мах – ажойиб мессенжер. Лекин одамлар ўзлари танлов қилиш имкониятига эга бўлиши керак. Мен яна бир бор айтмоқчиман: буни қилаётганлар – ваҳший кишилар. Ваҳшийлар! Одамлар Россия учун ҳалок бўлмоқда. Сиз нима қиляпсиз? Ўйланг! Бундай секинлаштириш туфайли ҳалок бўлган ҳар бир аскарнинг ўлими сизнинг жавобгарлигингизда бўлади!” дея огоҳлантирган у. 

Эслатиб ўтамиз, аввалроқ Дуров Россиядаги Telegram узилишларини танқид қилгани хабар қилинган эди. У фуқароларнинг эркинликларини чеклаш ҳеч қачон тўғри қарор эмаслигини, Telegram ҳар қандай босимдан қатъи назар, сўз эркинлиги ва шахсий ҳаёт дахлсизлигини ҳимоя қилишини айтган эди.

Эъзоза Олимова