Олимпиада илк бор Африкада ўтиши мумкин

Жанубий Африка ҳукумати Халқаро Олимпия қўмитаси (ХОҚ) билан Олимпиада ва Паралимпия ўйинларини ўтказиш бўйича расмий музокараларга киришди. Бу ҳақда президент маъмуриятидаги вазир Хумбудзо Нтшавхенига таяниб, “Sputnik Africa” хабар берди.

Нтшавхенининг айтишича, Жанубий Африка мавжуд инфратузилмасига, жумладан 2010 йилги футбол бўйича Жаҳон чемпионати учун қурилган объектлар ва тажрибага таянган ҳолда Олимпиадани ўтказишга қодир ва тайёр.

Унинг таъкидлашича, ХОҚ билан олиб борилаётган дастлабки жараён молиявий мажбуриятсиз техник-иқтисодий асослаш ва режалаштириш босқичларини ўз ичига олади.

Ўтган йили ушбу жараённи бошлаб берган спорт вазири Гайтон Маккензи ХОҚнинг янгиланган тендер тизими мезбонлик харажатларини 80 фоизгача камайтирганини қайд этди.

Тарихан, Африка қитъасида ҳали бирор давлат Олимпия ўйинларига мезбонлик қилмаган. Жанубий Африка илгари Кейптаун шаҳри орқали 2004 йилги ўйинлар учун ариза топширган, аммо ғолиб бўла олмаган эди. Шунга қарамай, мамлакат 2010 йилда FIFA Жаҳон чемпионатига мезбонлик қилган биринчи африкалик давлат сифатида тарихга кирган.

Эслатиб ўтамиз, аввалроқ Халқаро Олимпия қўмитаси (ХОҚ) 2026 йил бошида трансгендер спортчиларнинг Олимпия ўйинларида аёллар мусобақаларида иштирок этишини тақиқлаши мумкинлиги ҳақида хабар берилган эди.