Орбаннинг оиласи таҳдидга учрамоқда

Венгрия Бош вазири Виктор Орбан оиласига нисбатан таҳдидлар бўлаётганини айтди ва бунда Украинани айблади. Бу ҳақда у бугун, 11 март куни ўзининг Facebook’даги саҳифасида маълум қилди.

“Украиналиклар аллақачон оиламга, фарзандларим ва набираларимга таҳдид қилишмоқда. Ҳаммаси яхши, лекин ҳамма нарсанинг ҳам ўз чегараси бор!” дейди венгриялик сиёсатчи.

Қайд этиш жоиз, бунгача Владимир Зеленский агар Виктор Орбан 90 миллиард евролик кредитни блокласа, унинг манзилини Украина Қуролли кучлари жангчиларига бериб юбориш билан таҳдид қилган. Кейинчалик Виктор Орбан Венгрия Украина билан муросага бормаслигини ва Россиядан келадиган “Дружба” қувури орқали нефть транзитини тиклашга куч билан эришишини таъкидлаган.

Шунингдек, Орбан Зеленскийга “Дружба” нефть қувури фаолиятини тиклаш талаби билан очиқ хат ёзган. Кейинроқ у Зеленскийнинг ушбу қувурга нисбатан ҳаракатларини товламачилик деб атаган.

Шунингдек, сиёсатчилар бир-бирларининг шанига бир неча бор баёнотлар берганини қайд этиш лозим. Хусусан, Владимир Зеленский Мюнхен хавфсизлик конференциясида Владимир Путин ва Виктор Орбан ҳақида кескин фикрлар билдирганди. 

Эслатиб ўтамиз, аввалроқ Венгрия ҳукумати 82 миллион долларга яқин нақд пул ва олтин олиб кетилаётган икки зирҳли автомобилни тўхтатиб, етти нафар Украина фуқаросини қўлга олганди. Будапешт уларни пул ювишда гумон қилмоқда. Воқеа Венгрия ва Украина ўртасидаги сиёсий зиддиятни янада кучайтирди.