Путин резиденциясига ҳужум: Россия АҚШга Украина дронининг “контроллери”ни топширди

Россия Мудофаа вазирлиги Америка томонга навигацион контроллер тақдим этди ва у Новгород вилоятида Россия Президенти Владимир Путиннинг қароргоҳига учиб келган Украин дронидан олинганини даъво қилди. Бу ҳақда “The Moscow Times” хабар берди.

Нашрнинг ёзишича, қурилма дрон парвози маршрути бўйича шифрдан чиқарилган маълумотлар билан бирга АҚШнинг Москвадаги ҳарбий атташе аппарати вакилига топширилган. Бош штабнинг Бош разведка бошқармаси раҳбари Игорь Костюковнинг айтишича, Россия махсус хизматлари томонидан ўтказилган шифрни очиш ишлари “баҳс-мунозарасиз ва аниқ” тарзда ҳужумнинг нишони айнан Путиннинг Валдайдаги қароргоҳи бўлганини тасдиқлаган. Адмирал ушбу материаллар “барча саволларга барҳам беради ва ҳақиқатни аниқлашга хизмат қилади”, деган ишончни билдирган.

Россия Мудофаа вазирлиги Новгород вилоятида уриб туширилган Украина дронининг техник экспертиза натижаларини АҚШга топшириш нияти ҳақида 1 январь куниёқ эълон қилган.

Бу “The Wall Street Journal” нашрида мақола чиққанидан сўнг юз берган. Газета разведкадаги манбаларга таяниб, Марказий разведка бошқармаси (МРБ) Украина Қуролли кучлари томонидан Путиннинг қароргоҳига ҳужум қилинишига оид далилларни топмаганини ва бу ҳақда Президент Дональд Трампга маълумот берилганини ёзганди.

Шундан сўнг, Оқ уй раҳбари “New York Post”даги “Путиннинг “ҳужум” ҳақидаги жанговар баёнотлари тинчлик йўлида тўсиқ айнан Россия эканини кўрсатади” сарлавҳали бўлимга ҳавола эълон қилди. Орадан кўп ўтмай, Россия Мудофаа вазирлиги дрондан “парвоз вазифаси ёзилган файл” ажратиб олинганини маълум қилиб, унинг шифрдан чиқарилиши маршрутнинг якуний нуқтаси Президент қароргоҳи эканини кўрсатишини даъво қилди.

Эслатиб ўтамиз, Путиннинг Валдайдаги қароргоҳига ҳужум бўлгани ҳақида биринчи бўлиб Россия Ташқи ишлар вазири Сергей Лавров маълум қилган эди. У Украина Қуролли кучлари “29 декабрга ўтар кечаси” зарба беришга уринганини ва бунинг учун 91 та дрондан фойдаланганини айтган. ТИВ раҳбари бунинг ортидан Москва урушни якунлаш бўйича музокаралардаги позициясини қайта кўриб чиқишини таъкидлаган.

Шу билан бирга, Россия Мудофаа вазирлиги ўша куни эрталаб кўрсатилган даврда Новгород вилояти осмонида атиги 18 та дрон йўқ қилингани, соат 7:00 дан 9:00 гача эса яна 23 таси уриб туширилгани ҳақида хабар берган. Кейинчалик идора қолган 50 та дрон Брянск ва Смоленск вилоятлари устида йўқ қилинганини билдирган. Вазирлик иддаосига кўра, улар ҳам қароргоҳ томонга учиб кетаётган бўлган, ҳолбуки бу ҳудудлар Новгород вилояти билан ҳатто чегарадош ҳам эмас.

Мустақил ОАВ томонидан сўровга тутилган Валдай аҳолиси дронларни кўрмаганини ва ҳаво ҳужуми хавфи ҳақида SMS-хабарлар олмаганини айтган.

Украина Президенти Владимир Зеленский Путиннинг қароргоҳига ҳужум қилингани ҳақидаги баёнотни “фейк” деб атаган. Унинг фикрича, Москва шу йўл билан Киевдаги ҳукумат биноларига зарбалар бериш учун замин ҳозирлаб, Украина ва АҚШ ўртасидаги тинчлик музокараларида эришилган силжишни издан чиқармоқчи ва урушни тўхтатишдан бош тортишини оқламоқчи.

Путин Трампга ўз қароргоҳига ҳужум бўлгани ҳақида Зеленский билан Флоридада учрашувдан кўп ўтмай шикоят қилган. Ушбу музокаралар якунида АҚШ етакчиси тинчлик режасининг Донбасс тақдиридан ташқари 95 фоиз бандлари келишиб олинганини маълум қилган эди. Шу билан бирга, Москвада Кремлни ушбу ҳужжатнинг мазкур талқини қониқтирмаётгани айтилган.