Путинни қўлга олишга ҳожат йўқ – Трамп (видео)

АҚШ Президенти Дональд Трамп “Fox News” мухбири Питер Дусининг “Путинни қўлга олиш бўйича топшириқ берасизми?” деган саволига “бунга ҳожат йўқ”, деб жавоб қайтарди. Бу ҳақда у АҚШ нефть компаниялари раҳбарлари билан учрашув вақтида айтиб ўтган.

Мухбир сўзининг аввалида Украина Президенти Владимир Зеленскийнинг Россияга босим ўтказиш ва Чеченистон раҳбарини қўлга олиш кераклиги ҳақида айтган сўзларини эслаган.  

“Агар диктаторлар билан шундай муносабатда бўлиш мумкин бўлса, унда АҚШ кейинги қадам нима бўлишини билади”, деган Зеленский, бироқ у айнан кимга мурожаат қилганини айтмаган. 

Питер Дуси Дональд Трампга худди Delta кучлари Венесуэла раҳбари Николас Мадурони ҳибсга олгани каби “Путинни қўлга олиш” бўйича савол берган. 

“Худди у (Зеленский) сизни бориб Владимир Путинни қўлга олишга мажбур қилмоқчи бўлгандек эшитилди. Сиз қачондир Владимир Путинни қўлга олиш бўйича топшириқ берасизми?” дея сўраган у. 

Оқ уй етакчиси Дональд Трамп эса ушбу саволга доимгидек икки томонлама жавоб қайтарган. 

“Яхши, менимча, бунга ҳожат йўқ. Мен ҳар доим у билан яхши муносабатда бўлганман. Лекин ҳозирги вазиятдан жуда ҳафсалам пир бўлмоқда”, деган у. 

У Украина ва Россия ўртасида тинчлик келишуви тузилмай қолганидан норозилигини билдириб, бу масала сайловолди дастурида устувор вазифа бўлганини таъкидлаган.

“Мен саккизта урушни якунлаганман. Мен бу иш ўртача ёки энг осон ишлар қаторида бўлади деб ўйлаган эдим. Биласизми, Питер, сўнгги ой ичида улар 31 минг одамни йўқотди, уларнинг кўпи рус аскарлари ва Россия иқтисодиёти ёмонлашмоқда. Менимча, биз бунинг устидан келишувга эришамиз. Мен хоҳлардимки, бунинг тезроқ якунланишини, чунки бу урушда кўп одамлар нобуд бўлмоқда”, деган Трамп.

Эслатиб ўтамиз, аввалроқ Чеченистон раҳбари Рамзан Қодировнинг учинчи ўғли Адам Қодиров, агар отаси ёки Россия Президенти Владимир Путин буйруқ берса, Украина Президенти Владимир Зеленскийни суд қилиш учун Грознийга олиб келишга ваъда берганди.