Рамзан Қодировнинг 9 ёшли арзандаси 10 млн долларлик саройга эгалик қилади – ОАВ

Рамзан Қодировнинг 9 ёшли ўғли 10 миллион долларлик сарой эгаси экани ошкор бўлди. Бу ҳақда “The Insider” нашри хабар берди.

Чеченистон раҳбари Рамзан Қодировнинг икки нафар ўғли – 19 ёшли Али (Зелимхон) ва 9 ёшли Абдуллоҳ Грозний марказида жойлашган иккита алоҳида саройнинг эгаси экани маълум бўлган. 

Россия кўчмас мулк маълумотларига кўра, умумий қиймати 1,3 миллиард рубль (тахминан 16,7 миллион доллар) бўлган ушбу бинолар Қодировнинг шахсий қароргоҳидан қарийб 300 метр масофада жойлашган. 

Али Қодиров 2024 йил февраль ойида Адам Қосимов исмли шахсдан 4 500 квадрат метр ер майдони ва 1 300 квадрат метрли уйни расмийлаштирган. ОАВ маълумотига кўра, Қосимов эҳтимол воситачи шахс бўлиши мумкин, чунки у бундай қиммат мулкка эгалик қилишига оид ҳеч қандай далил йўқ.

Абдуллоҳ Қодиров эса 7 ёшида 4 000 квадрат метр ер ва 2 000 квадрат метрли уй эгасига айланган. Реестрга кўра, ушбу мулк унга отаси томонидан ўтказиб берилган: аввал Рамзан Қодиров ер майдонини ижарага олган, кейин уни ўғлига қайта расмийлаштирган, Абдуллоҳ эса 2023 йилда мулкни хусусийлаштирган. Абдуллоҳга тегишли саройнинг тахминий қиймати 800 миллион рублни, яъни қарийб 10 миллион долларни ташкил этади. 

Худди шу ҳудудда, Қодиров қароргоҳи рўпарасида, унинг яна бир ўғли – 18 ёшли Адамга тегишли сарой жойлашган. 2025 йил сентябрида ОАВ Адам Қодиров тўрт қаватли, майдони 2 000 квадрат метр бўлган ва тахминан 750 миллион рубль (9,67 миллион доллар) баҳоланадиган уй эгасига айланганини хабар қилган эди. Шунингдек, Рамзан ва Адам Қодировларнинг саройлари орасида жойлашган аввалги уй бузиб ташлангани ҳам айтилган. 

Али Қодиров “Аҳмад” жанговар клубига раҳбарлик қилиши билан танилган. 2024 йил август ойида Рамзан Қодиров уни “Чеченистон Республикасига хизматлари учун” медали билан мукофотлаб, спорт ривожига қўшган “улкан ҳиссаси”ни таъкидлаган. Бироқ Али Қодиров атиги битта жанг ўтказган, у бошқараётган клуб эса амалда фаолият юритмаган. 

Эслатиб ўтамиз, аввалроқ айрим Чеченистон Telegram-каналларида республика раҳбари Рамзан Қодировнинг ўғли Адам Қодиров Грознийда йўл-транспорт ҳодисасига учрагани ҳақида хабарлар тарқалган эди. Уларнинг маълумотига кўра, Адам Қодиров жароҳат олиб, шифохонага етказилган. Хабарларда, шунингдек, жабрланувчини Москвага олиб кетишгани айтилган.