Рим папаси Илон Маскнинг бойлиги ортишини қоралади

Рим папаси Лео XIV дунёнинг энг бой одамларидан бири – Илон Маскнинг триллионер бўлиши ортидан дунё катта балога дуч келишини айтди. Бу ҳақда папа “Crux” нашрига берган интервьюсида сўз очди.

Папанинг сўзларига кўра, у дунёда инсон ҳаётининг, оиланинг ва жамиятнинг қадри унутилиб бораётганидан қаттиқ хавотирда.

“Айтишларича, Илон Маск дунёдаги биринчи триллионер бўлар эмиш. Бу нимани англатади? Агар энди ягона қадрият шундай нарсадан иборат бўлса, демак, биз катта балодамиз”, деган Лео XIV. 

Папанинг таъкидлашича, шунингдек,  Ватикан Украинадаги можаро бўйича ҳеч бир тарафни танламайди. 

“Муқаддас тахт, можаро бошланганидан буён ҳақиқатан ҳам нейтрал бўлиб қолиш учун катта саъй-ҳаракатлар қилди. Биз ҳали ҳам умид қиламиз. Мен ҳеч қачон умидни йўқотмаслигимиз кераклигига ишонаман”, деган папа. 

Лео XIV муаммоларни ҳал этишда БМТнинг роли ҳақида гапираркан, ташкилотни ўз кучидан айрилганини билдирди. 

“Афсуски, ҳозирда кўпчилик тан олганидек, БМТ одамларни бирлаштириш қобилиятини йўқотган кўринади”, деган у. 

Понтифик футбол бўйича берган жавобида эса кўп вақтини Перуда ўтказганини эслаб, жаҳон чемпионатида эҳтимол, ушбу мамлакат терма жамоасига мухлислик қилишини айтди.

“Аммо мен Италия жамоасининг ҳам катта мухлисиман”, дея қўшимча қилган папа.