Роналду Мадридда шахсий клуб очади

Португалиялик футбол юлдузи Криштиану Роналду Мадридда янги шахсий аъзолик клубини очишга ҳозирлик кўрмоқда. Мобил телефонлар ва суратга олиш тўлиқ тақиқланадиган ушбу лойиҳа жорий йил якунига қадар ишга туширилади. Бу ҳақда “Goal” нашри хабар берди.

Манбага кўра, Роналду тадбиркор Иньиго Ониеви ва бизнесмен Мануэль Кампос Гуаллар билан ҳамкорликда Vega Private Members Club'ини яратмоқда. Клуб Мадриднинг энг қиммат ҳудуди – Олтин миль марказидаги Лагасcа кўчаси, 88-уйда жойлашади. Очилиш йил якунида бўлиб ўтиши режалаштирилган.

1 000 квадрат метр майдонга эга бўлган маконда мобил телефонлар ва суратга олиш тўлиқ тақиқланади, бу эса клубнинг махфийликка қаратилган асосий талабларидан биридир. Куннинг биринчи ярмида клуб бизнес учрашувлари, шахсий офислар, коворкинг майдонлари ва подкаст студияси сифатида ишлатилади. Кечаси эса у эксклюзив кечки овқатлар, ёпиқ тадбирлар ва махсус барлар билан ижтимоийлашув маконига айланади.

Шунингдек, аъзоларга мўлжалланган махсус вино клуби ҳам ташкил этилади. Клубга кириш арзон эмас. Энг обрўли, фақат таклифнома орқали бериладиган аъзоликнинг бир марталик тўлови 15 000 евро. Бу пакет умрбод киришни таъминлайди. Шунингдек, йиллик 2 400 евро ва 2 000 евролик бошланғич тўлов талаб қилинадиган бошқа пакетлар ҳам мавжуд.

Эслатиб ўтамиз, аввалроқ футбол бўйича Португалия терма жамоаси сардори Криштиану Роналду аралаш яккакурашлар бўйича WOW FC компаниясининг ҳаммуаллифига айлангани ҳақида хабар берилган эди.