Россияда айрим мигрантларнинг болалари тил имтиҳонидан озод қилиниши мумкин

Россия Давлат думасига янги қонун лойиҳаси киритилди. Унда рус тили она тили бўлган хорижий фуқароларнинг фарзандларини мактабга киришдан олдин ўтказиладиган рус тили тестидан озод этиш таклифи илгари сурилган. Бу ҳақдаги ҳужжат Давлат думасининг электрон базасида эълон қилинган.

Қонун лойиҳаси муаллифлари Коммунистик партия депутатлари Михаил Матвеев, Олег Михайлов ва Сергей Обухов саналади.

“Рус тили она тили бўлган ва маданий жиҳатдан Россияга яқин бўлган хорижий фуқароларнинг, жумладан, қайтиб келаётган ватандошларнинг болаларини рус тили билим даражасини аниқлаш бўйича мажбурий тестдан ўтказиш амалий маънога эга эмас”, дейилади қонун лойиҳасида. 

Лойиҳага кўра, рус тили тестидан озод этиш тартибини Россия Таълим вазирлиги белгилайди.

Маълумот учун, 2025 йилнинг 1 апрелидан бошлаб хорижий фуқароларнинг болалари мактабга киришдан олдин рус тили бўйича имтиҳон топшириши мажбурий этиб белгиланган эди. Сўнгги беш ой ичида 23,6 мингта ариза топширилган, 8 минг бола имтиҳонга киритилган ва уларнинг фақат ярми тестни муваффақиятли топширган.

Эслатиб ўтамиз, аввалроқ Россияда жорий йилнинг учинчи чорагида (июль, август, сентябрь) хорижий фуқароларнинг рус тили бўйича имтиҳон топширишда 35 фоиздан ортиғи биринчи уринишдаёқ имтиҳондан ўта олмагани ҳақида хабар берилганди.