Шаҳноза Мирзиёева Жаҳон сув спорти федерацияси Бюроси таркибига қўшилди

Бугун, 29 июль куни Сингапурда  Жаҳон сув спорти федерацияси (Wорлд Aquatics) Конгресси бўлиб ўтди. Унда Ўзбекистон Президенти Шавкат Мирзиёевнинг кенжа қизи, Ижтимоий ҳимоя миллий агентлиги директорининг биринчи ўринбосари Шаҳноза Мирзиёева федерация Ижроия қўмитаси Бюросининг аъзоси сифатида сайланди. Бу ҳақда федерация расмий сайтида эълон қилинди.

Шаҳноза Мирзиёеванинг ўзи ҳам бу ҳақда Instagram’даги саҳифасида янгиликни эълон қилиб, ушбу таклифни қабул қилганини билдирди.

“Менга билдирилган ишонч учун миннатдорлик билдираман ва фахр билан World Aquatics Бюроси таркибига кириш таклифини қабул қиламан! Мен учун ушбу ташкилотнинг бир қисми бўлиш ва Ўзбекистон манфаатларини глобал даражада илгари суриш катта масъулиятдир. Бу эътироф фақат шахсан менга эмас, балки спортни ҳар қандай шароит ва имкониятлардан қатъи назар ҳамма учун очиқ қилиш йўлида меҳнат қилаётган жамоамизнинг ҳам ютуғидир”, деб ёзди у.

Шунингдек, Мирзиёева Бюро фаолиятида иштирок этиши сув спорт турларини ривожлантиришга эътиборни оширишга хизмат қилишини айтиб, World Aquatics таркибидаги барча спорт турлари янада оммабоп бўлиши, шунингдек, ўзбек спортчилари номлари жаҳон ареналарида янада баландроқ янграши учун барча куч-ғайратини беришга тайёр эканини билдирган.

Маълумот учун, Шаҳноза Мирзиёева 2024 йилнинг 13 августида Миллий паралимпия қўмитаси раиси биринчи ўринбосари лавозимига сайланганди.