Шимолий Корея АҚШ ҳудудига етиб бора оладиган ракета двигателини синовдан ўтказди

Шимолий Корея ер усти шароитида модернизация қилинган қаттиқ ёқилғили ракета двигателини синовдан ўтказди. Бу двигатель АҚШ материк қисмига зарба бера оладиган қитъалараро баллистик ракеталарда қўлланиши мумкин. Бу ҳақда Корея марказий телеграф агентлиги хабар берди.

Хабарга кўра, синовни мамлакат етакчиси Ким Чен Ин шахсан кузатган ва уни мамлакат стратегик қуролларини ривожлантиришда “катта аҳамиятга эга” деб баҳолаган. Бу ишлар мудофаани ривожлантириш бўйича беш йиллик режа доирасида амалга оширилмоқда.

Янги двигатель углерод композит материаллардан тайёрланган бўлиб, унинг максимал тортиш кучи тахминан 2,5 минг килонютонни ташкил этади. Бу кўрсаткич ўтган йилнинг сентябрь ойида синовдан ўтказилган ўхшаш двигателникидан (1,97 минг килонютон) юқори.

Жанубий кореялик экспертларнинг таъкидлашича, Пхеньян двигателнинг ишлаш вақти каби муҳим техник параметрларни ошкор қилмаган, шу сабабли эълон қилинган хусусиятлар бир оз бўрттирилган бўлиши мумкин.

Сўнгги йилларда Шимолий Корея бир неча бор қитъалараро баллистик ракеталарни синовдан ўтказиб, уларнинг учиш масофаси АҚШ материк ҳудудигача етишини намойиш қилган. Бунда айниқса қаттиқ ёқилғили двигателлар қўлланилиши муҳим, чунки улар суюқ ёқилғили тизимларга нисбатан учиришдан олдин аниқланиши қийинроқ.

Эслатиб ўтамиз, аввалроқ КХДР етакчиси Ким Чен Ин 15-чақириқ Олий халқ мажлисининг биринчи сессиясидаги дастурий нутқида Жанубий Кореяни расман “энг ашаддий душман давлат” деб эълон қилганди.