Шумахернинг яна бир автомобили аукционга қўйилди

Етти карра жаҳон чемпиони Михаэль Шумахер 1997 йилги Бельгия Гран-присида бошқарган “Ferrari F310 B” автомобили январь ойи охирида кимошди савдосига қўйилади. Бу ҳақда RM Sotheby’s аукцион уйи хабар берди.

Манбага кўра, лотнинг тахминий баҳоси 5,5 миллион евродан 7,5 миллион еврогача деб белгиланган.

Маълумотларига кўра, ушбу шасси Шумахер томонидан Спа-Франкоршам трассасида саралаш босқичида қўлланилган. Кейинчалик у бошқа автомобилга ўтган. Шундан сўнг, ушбу машинани унинг жамоадоши Эдди Ирвайн бошқарган: у Италия Гран-присида олтинчи ўринни эгаллаган, кейинги пойгада саккизинчи бўлган, аммо Австрияда Жан Алези билан тўқнашувдан кейин пойгани тарк этган.

Германия ва Япония босқичларида мазкур шасси захира автомобили сифатида хизмат қилган ва шундан кейин пойгаларда қўлланилмаган. “Феррари” компанияси автомобилни 1999 йилда сотган.

Ўшандан бери машина бир неча бор оммага намойиш этилган. Хусусан, у 2019 йилдаги “Goodwood” тезлик фестивалида, Михаэль Шумахернинг 50 йиллик юбилейи муносабати билан кўргазмага қўйилган.

Маълумот учун, аукцион жорий йилнинг 28 январь куни Париж шаҳрида бўлиб ўтиши режалаштирилган.

Эслатиб ўтамиз, аввалроқ Михаэль Шумахернинг 1992 йилги “Benetton Ford B192” пойга машинаси кимошди савдосига қўйилган эди.