Си Цзиньпин Украинадаги уруш сабабли илк бор Путинни танқид қилди

ХХР раҳбари Си Цзиньпин Пекиндаги саммит чоғида Россия Президенти Владимир Путин шаънига илк бор вазмин тарзда танқидий фикр билдирди. Бу ҳақда “Financial Times” (FT) нашри хабар берди.

FT журналистлари ХХР раҳбари ва АҚШ Президенти Дональд Трамп ўртасидаги музокараларнинг америкаликлар томонидан берилган баҳоси билан таниш бўлган манбаларга таяниб хабар беришича, Си Цзиньпин Владимир Путин Украинага қарши уруш бошлаш қароридан пушаймон бўлиши мумкинлигини айтган.

FT маълумотларига кўра, Хитой етакчиси ўз тахминларини Украинадаги уруш мавзусига тўхталиб ўтилган кенг қамровли муҳокамалар давомида билдирган.

Қайд этилишича, Си Цзиньпиннинг Украинадаги воқеалар ҳақидаги баёнотлари ўтмишдаги ҳар қандай чиқишларига қараганда анча кескинроқ янграган. Бундан аввал у на Путиннинг шахсиятига ва на урушнинг ўзига бундай баҳо берган эди. Манбаларнинг таъкидлашича, Си Цзиньпин АҚШнинг олдинги президенти Жо Байден билан учрашувларида ҳеч қачон бундай баёнотлар бермаган.

Кейинчалик Хитой Ташқи ишлар вазирлиги FT’даги ушбу мақола мутлақо уйдирма эканлигини маълум қилди.

“Ушбу маълумотлар фактларга зид бўлиб, соф уйдирмадан иборатдир”, дейди Пекиндаги брифингда Хитой ТИВ расмий вакили Го Цзякунь. 

Эслатиб ўтамиз, аввалроқ АҚШ Президенти Дональд Трамп Хитойга боргани, бироқ у Пекинни на савдо, на Эрон масаласида жиддий натижаларга эришмасдан тарк этгани ҳақида хабар берилган эди. Трампнинг ортидан Путиннинг ҳам Хитойга бориши кутилмоқда. Россия етакчисининг Хитойга ташрифи жорий йилнинг 19-20 май кунлари бўлиб ўтади ва икки мамлакат ўртасидаги Яхши қўшничилик, дўстлик ва ҳамкорлик тўғрисидаги шартноманинг 25 йиллигига бағишланади.