Словакия Украинага электр таъминотини тўхтатиб қўйиш билан таҳдид қилди

Агар Киев Словакияга нефть транзитини тикламаса, мамлакат фавқулодда электр энергияси етказиб беришни тўхтатиши мумкин. Бу ҳақда бугун, 21 февраль куни Словакия Бош вазири Роберт Фицо ўзининг Facebook сахифасида маълум қилди.

Бош вазирнинг сўзларига кўра, қарор жорий йилнинг 23 феврал кунидан эътиборан қабул қилиниши мумкин.

“Агар Владимир Зеленский душанба куни Словакияга нефть етказиб беришни тикламаса, мен шу куни тегишли Словакия компаниялардан Украинага фавқулодда электр энергияси етказиб беришни тўхтатишни сўрайман”, деб ёзган Фицо.

Қайд этиш жоиз, бу баёнот мамлакатлар ўртасида нефть транзити ва энергетика ҳамкорлиги масалалари бўйича давом этаётган келишмовчиликлар фонида айтилди.

Эслатиб ўтамиз, аввалроқ Венгрия Европа Иттифоқининг Украинага 90 миллиард евро миқдорида кредит ажратиш тўғрисидаги қарорини тўсиб қўйганди. Бунга Венгрия Ташқи ишлар вазири Петер Сийяртонинг айтишича, мамлакатга “Дружба” нефть қувури орқали нефть транзити тикланмагунча мазкур кредитни маъқуллашга розилик берилмайди.