Собиқ депутат қамалди: у Россия манфаатлари учун пора олган

Британиялик сиёсатчи Нейтан Гилл Европа парламентидa Россия фойдасига баёнотлар қилиш эвазига пора олгани учун ўн йилдан ортиқ қамоқ жазосига ҳукм қилинди. “The Moscow Times” нашри хабар берди.

Қайд этилишича, Европа парламентининг собиқ аъзоси ва Уэлсдаги Reform UK партиясининг собиқ раҳбари Нейтан Гилл Россиянинг Европадаги сиёсий манфаатларини лобби қилиш учун пора олганини тан олган. 2025 йилнинг 21 ноябрь куни Лондоннинг марказий жиноят ишлари бўйича суди уни 10 йил 6 ой муддатга озодликдан маҳрум этди.

Судья Бобби Чима-Граббнинг айтишича, Гилл “ўзига юкланган жамоат вазифаларини нотўғри бажариши эвазига пул олган”. Судья унинг Европарламентда Украина борасида Москвага маъқул нарративларни илгари сурганини ва бу хатти-ҳаракатлар Буюк Британия миллий хавфсизлигига таҳдид солганини таъкидлади.

52 ёшли Гилл 2024 йил сентябрь ойида порахўрлик бўйича саккиз банддан иборат айбловларни тан олган. У 2018 йил декабрдан 2019 йил июлгача Европа парламенти депутати бўлган даврида пул олган. Прокурор Марк Хейвуднинг маълум қилишича, Гилл пора эвазига Европа парламентда керакли масалаларни кўтариб чиққан ва манфаатдор шахслар учун тадбирлар ташкил қилган. У 2020 йилда Буюк Британия Европа Иттифоқидан чиқиши сабаб парламентни тарк этган.

Тергов маълумотларига кўра, Гилга пулни Олег Волошин берган. Волошин – Украина сиёсатчиси бўлиб, 2019-2022 йилларда Виктор Медведчукнинг “Ҳаёт учун мухолифат платформаси” партиясидан Олий Рада депутати бўлган. Медведчук Россия Президенти Владимир Путин билан яқин алоқага эга шахс сифатида танилган.

Волошин ўз сиёсий фаолияти давомида ДНР ва ЛНР тузилишини оқловчи, Россия манфаатларини қўллаб-қувватловчи баёнотлари билан танилган. 2022 йилда унинг Россия билан боғлиқ фаолияти “Украинани беқарорлаштиришга уриниш” сифатида баҳоланиб, АҚШ уни санкциялар рўйхатига киритган.

2023 йилда Украинада Волошинга давлатга хиёнат айблови қўйилган. Аммо у ўша пайтда мамлакатда бўлмаган – Украина хавфсизлик хизмати маълумотига кўра, у Россиянинг кенг кўламли босқинидан бир оз олдин мамлакатдан чиқиб кетган. ОАВ хабарига кўра, у оиласи билан Беларусда яшамоқда.

Олег Волошин билан Германиядаги ўнг популистик “Германия учун муқобил” партияси вакили Максимилиан Кра ўртасида ҳам алоқадорлик бор, деб ҳисобланади. 2023 йил декабрь ойида АҚШ Федерал тергов бюроси вакиллари Крани Кремлга яқин манбалардан “шубҳали тўловлар” олган-олмагани юзасидан сўроқ қилган.

“Der Spiegel” маълумотларига кўра, Америка махсус хизматлари қўлига Волошин ва Кра ўртасидаги ёзишмалар тушган, унда россияпараст фаол немис ўнг популисти билан қандайдир “техник топшириқлар” учун “компенсация” масалаларини муҳокама қилган.

Эслатиб ўтамиз, аввалроқ Европа Комиссияси президенти Урсула фон дер Ляйенга ишончсизлик вотумини билдириш ташаббуси билан чиққан Руминия парламенти депутати Георге Пиперей уни туҳмат учун судга берганди.