Солиқ идораси мансабдори пора билан қўлга тушди

Қашқадарё вилояти Қамаши туманида Солиқ идораси мансабдори 3 минг доллар пора билан қўлга тушди. Бу ҳақда Давлат хавфсизлик хизмати хабар берди.

Қайд этилишича, Қамаши туманида яшовчи 1981 йилда туғилган муқаддам судланган шахс 360 млн сўмлик солиқ қарздорлигини тўламагани сабабли Иқтисодий суд томонидан банкрот деб топилган ғишт ишлаб чиқарувчи МЧЖнинг солиқ қарздорлигини тўлиқ тўламасдан, заводга нисбатан қўйилган тақиқни ўзининг мансабдор танишлари орқали бекор қилдириб, унинг фаолиятини тиклаб бериш эвазига МЧЖ раҳбаридан 4000 АҚШ доллари талаб қилган.

ДХХнинг Қашқадарё вилояти бўйича бошқармаси ҳамда Иқтисодий жиноятларга қарши куришиш департаменти ҳамкорлигида ўтказилган тезкор тадбирда мазкур фуқаро олдиндан 3000 АҚШ доллари олган вақтида ушланган.

Шунингдек, тезкор тадбир давом эттирилиб, ушбу ноқонуний ишга алоқадор бўлган Қамаши туман солиқ инспекцияси бошлиғининг ўринбосари ҳам 3000 АҚШ долларини олган вақтида ашёвий далиллар билан ушланган.

Билдирилишича, ҳозирда ҳолат юзасидан икки қонунбузарга нисбатан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ 300 кг пилла топшириш режасини ёпиб бериш эвазига жами 21 млн сўм пора талаб қилган Қашқадарё вилояти Деҳқонобод тумани ҳокими ўринбосарига нисбатан жиноят иши қўзғатилганди.