Суд Мутвала Шихлинскийни 2 ойга ҳибсга олди

Екатеринбургнинг Ленинский туман суди маҳаллий озарбайжон диаспораси раҳбарининг ўғли ва адвокат Мутвала Шихлинскийни 14 сентябргача тергов изоляторига жўнатди. У давлат мансабдор шахсига нисбатан зўравонлик қўллаш (Жиноят кодексининг 318-моддаси) бўйича қўзғатилган жиноят ишида айбланувчига айланди. Бу ҳақда РБК хабар берди.

“У ўз айбини тўлиқ тан олмаяпти. Уни ҳибсга олиш ҳақидаги қарор устидан яқин кунларда ноқонуний апелляция шикояти берилади”, дейди Мутвала Шихлинскийнинг адвокати Павел Коробов.

Шихлинскийнинг ҳибсга олингани ҳақида 15 июль куни кечқурун хабар қилинди. Эртаси куни тергов уни ҳибсга олиш учун судга ариза берди. Ундан олдин адвокат Свердловск вилояти бўйича тергов бўлимида сўроққа тутилган, кейин у вақтинчалик ҳибсхонага жойлаштирилган.

Суд мажлиси судья Александр Суслов раислигида ёпиқ эшиклар ортида ўтди. Эҳтиёт чораси ҳуқуқ-тартибот органи ходимига нисбатан зўравонлик қўллаш бўйича тергов ҳаракатлари доирасида танланган.

Судда маълум бўлишича, иш қўзғатилишига июль ойи бошида Екатеринбургдаги Баку Плаза савдо маркази яқинида содир бўлган воқеа сабаб бўлган. Ўшанда ҳуқуқ-тартибот идоралари ходимлари айбланувчининг отаси, минтақадаги озарбайжон диаспораси раҳбари Шаҳин Шихлинскийни ҳибсга олишга уринган. Операция вақтида у ўғли Мутвала бошқарувидаги “гелик” автомашинасида бўлган.

Тергов маълумотларига кўра, ҳайдовчи автомобилнинг очиқ эшиги билан ФХХ ходимларидан бирини уриб юборган.

Мутвали Шихлинский адвокат мақомига эга. Қонунга кўра, унга нисбатан жиноий жавобгарликка тортиш фақат маҳаллий Тергов қўмитаси раҳбарининг рухсати ва назорат қилувчи прокурорнинг розилиги билан мумкин.