Тошкентда 57 ёшли эркак онасини ўлдирди

Тошкент шаҳрининг Мирзо-Улуғбек туманида 57 ёшли эркак спиртли ичимлик таъсирида 77 ёшли онасини ўлдирди. Бу ҳақда Тошкент шаҳар судлари хабар берди.

Қайд этилишича, маст ҳолатда бўлган эркак онасига қўл ва оёқлари билан бир неча зарбалар бериб, оғир жароҳатлар етказган, шунингдек, бўйнини босиб, механик асфиксия содир этган. Жароҳатлар қовурға синишлари, бош мия шикастлари ва кенг қон кетишларни ўз ичига олган.

Тергов маълумотларига кўра, охирги низога квартирани сотиш ва эркакнинг собиқ рафиқаси ва қизи яшаётган Россияга кўчиш режалари сабаб бўлган. Онаси бу режаларни қатъиян рад этган. Маст ҳолат ва оилавий низолар фожианинг юзага келишига олиб келган.

Суд жараёнида айбланувчи айбини фақат қисман тан олган, воқеаларнинг бир қисмини эсламаслигини айтган. Бироқ экспертиза хулосалари, гувоҳлар кўрсатмалари, тергов материаллари ва моддий далиллар унинг айбини тасдиқлаган.

Суд қарори билан эркак 15 йилга озодликдан маҳрум қилинди. Жазони умумий тартибли колонияда ўташи белгиланди. Шунингдек, судланувчи спиртли ичимликка қарамлиги бўйича мажбурий даволанишга юборилади.
 

Эслатиб ўтамиз, аввалроқ Сурхондарёда 71 ёшли эркак тушлик тайёрламаган хотинини ўлдирганди.