Трамп қароргоҳига кирмоқчи бўлган эркак отиб ўлдирилди

АҚШ Махфий хизмати 20 ёшли эркакни Флорида штатидаги Мар-а-Лаго қароргоҳи ҳудудига рухсатсиз киришга урингани учун отиб ўлдирди. Ҳодиса вақтида қароргоҳда ҳеч ким бўлмаган, Президент Дональд Трамп Вашингтонда бўлган. Бу ҳақда АҚШ Махфий хизмати матбуот котиби Энтони Гульельми Х ижтимоий тармоғида ёзиб қолдирди.

Унга кўра, воқеа кеча, 22 февраль куни тахминан тунги соат 1:30 да содир бўлган. Ҳалок бўлган шахснинг исми ошкор этилмаган, унинг 20 ёшда экани маълум. Баёнотда айтилишича, у қароргоҳнинг шимолий дарвозаси яқинида милтиққа ўхшаш буюм ва ёқилғи билан пайқаб қолинган.

Махфий хизмат агентлари ва шериф ўринбосари аввал у билан мулоқотга киришган, кейин вазият тўқнашувга айланган ва ҳуқуқ-тартибот ходимлари ўқ узган. Махфий хизмат ходимлари ҳам, полициячилар ҳам жабрланмаган.

Ҳодиса пайтида ҳудудда ҳеч ким бўлмаган. Трамп ҳозирда Вашингтонда. АҚШ етакчиси Мар-а-Лагони кўпинча бошқа давлат раҳбарлари ва сиёсатчилар билан музокаралар ўтказиш жойи сифатида ишлатади.

Бу Трамп резиденциясига ноқонуний киришга биринчи уриниш эмас. Ўтган йил ёзида Техаслик бир эркак Мар-а-Лаго ҳудудига кириб, ўз сўзларига кўра, Инжил ҳақида суҳбатлашиш ва Трампнинг набирасига уйланиш ниятини очиқдан очиқ билдирган. Сигнализация ишга тушгач, агентлар тезда етиб келган ва 23 ёшли Энтони Реесни қўлга олган. У девордан ошиб ўтганини тан олган.

2020 йил январида ҳам резиденция яқинида отишма содир бўлган. Қора йўлтанламас автомобилдаги номаълум шахслар иккита назорат пунктини бузиб ўтган, ҳуқуқ-тартибот ходимлари эса асосий дарвоза томон яқинлашаётган машинага қарата ўқ узган ва уларни қўлга олган.

2019 йил апрелида эса Хитой фуқароси Мар-а-Лаго ҳудудига киришга муваффақ бўлган. У ўзини ёпиқ клуб аъзоларидан бирининг қариндоши сифатида таништириб, агентни чалғитган. Кейинчалик у қўлга олинган, ундан тўртта мобил телефон, ноутбук ва зарарли дастур ўрнатилган флеш-хотира топилган. Ўша йилнинг ноябрида суд уни саккиз ойга озодликдан маҳрум қилган, бироқ қамоқда ўтказган вақти инобатга олиниб, бир неча кундан сўнг озодликка чиқарилган.

Эслатиб ўтамиз, аввалроқ АҚШ суди Президент Дональд Трампга суиқасд қилишга уриниш иши бўйича айбдор деб топилган Райан Раутни умрбод қамоқ жазосига ҳукм қилганди.