Трамп келишувни Путин эмас, Зеленский тўхтатиб турганини айтди

АҚШ Президенти Дональд Трамп Украина ва Россия ўртасидаги урушни тугатишга қаратилган потенциал тинчлик келишувини Владимир Путин эмас, аксинча, Украина Президенти Владимир Зеленский тўхтатиб турганини маълум қилди. Бу ҳақда у, 14 январь куни Овал офисда “Reuters”га берган интервьюсида айтди.

Трампнинг сўзларига кўра, Россия Президенти Владимир Путин тўрт йилдан ошган Украина босқинини якунлашга тайёр. Украина раҳбари Владимир Зеленский эса бу масалада бироз эҳтиёткорроқ. 

“Мен ўйлайманки, у (Путин) келишув тузишга тайёр. Бироқ Украина (Зеленский) бунга тўлиқ тайёр эмас, назаримда”, деган у. 

АҚШ етакчисидан “нега Америка бошчилигидаги музокаралар Европанинг Иккинчи жаҳон урушидан бери энг катта қуруқлик можаросини (Россия-Украина уруши назарда тутилмоқда) ҳал қилмади?” деб сўралганда, у “Зеленский” деб жавоб берган. 

Хабарда айтилишича, Трампнинг бу баёноти Украина етакчисига нисбатан янги норозиликни акс эттиради. Икки Президент узоқ вақт ўзгарувчан ва баъзан кескин муносабатга эга бўлиб келмоқда, аммо Трампнинг иккинчи президентлик даврининг биринчи йилида уларнинг мулоқоти бироз яхшилангани сезилган. 

Эслатиб ўтамиз, аввалроқ Дональд Трамп “Fox News” мухбири Питер Дусининг “Путинни қўлга олиш бўйича топшириқ берасизми?” деган саволига “бунга ҳожат йўқ”, деб жавоб қайтарганди.