Трамп Мадуронинг куни яна бир давлат етакчисининг бошига тушишини айтди

АҚШ Президенти Дональд Трамп Колумбия етакчиси Густаво Петрони гиёҳванд моддалар ишлаб чиқаришда айблади ва уни ағдариш бўйича операция ўтказилиши мумкинлигини истисно этмади. Бу ҳақда Оқ уй раҳбари кеча, 4 январь куни журналистлар билан Air Force One самолёти бортидаги суҳбат чоғида сўз очди.

Трамп Колумбия учун ҳам яқинда Венесуэла президенти билан содир бўлганига ўхшаш сценарий такрорланиши мумкинлигини инкор этмаган.

“Колумбия ҳам жуда оғир аҳволда, уни кокаин ишлаб чиқаришни ва уни АҚШга сотишни ёқтирадиган касал одам бошқаряпти ва у бу иш билан узоқ шуғуллана олмайди”, деган Трамп. 

Унинг сўзларига кўра, АҚШнинг вазифаси – атрофида “ҳаётга лаёқатли ва муваффақиятли давлатлар йиғиши керак. Шу билан бирга, у ерларда Америка эркин нефть қазиб олиши лозим. 

“Бу яхши. Бу нархларни туширади. Бу мамлакатимиз учун фойдали”, дея қўшимча қилган Трамп. 

Шунингдек, Трампдан бу гаплар Колумбияга қарши операция эҳтимолини англатадими, деб сўралганда, у: “Ёмон эшитилмайди”, деб жавоб берган. 

Кўп ўтмай Густаво Петро Х ижтимоий тармоғида пост эълон қилиб, Трампнинг сўзларини рад этган. 

“Колумбияда суд ҳокимияти менга бўйсунмайди, у мендан мустақил ва асосан мухолифатимиз томонидан назорат қилинади. Агар сиз мафия ва кокаин савдоси ҳақида билмоқчи бўлсангиз, Колумбия суд архивларига қарашингиз кифоя. Шу сабабли Трампнинг баёнотларини қатъиян рад этаман: сўнгги 50 йил ичида, на ўтмишда, на ҳозир, менинг исмим гиёҳванд моддалар савдоси билан боғлиқ бирорта суд ишида тилга олинмаган. Менга туҳмат қилишни бас қилинг, жаноб Трамп. Қуролли курашдан, кейин эса Колумбия халқининг тинчлик учун курашидан чиққан Лотин Америкаси Президенти билан бундай оҳангда гапириб бўлмайди”, дея ёзган Петро. 

Эслатиб ўтамиз, 3 январь куни Каракасда портлашлар содир бўлганди. Шундан сўнг, Дональд Трамп АҚШ кенг кўламли зарбалар берганини, Венесуэла президенти Николас Мадуро эса рафиқаси билан бирга қўлга олиниб, мамлакатдан олиб чиқиб кетилганини маълум қилган эди. АҚШ уларни “наркотерроризм”да айблагани хабар қилинган. Айбланувчилар орасида Мадуронинг ўзи ва рафиқасидан ташқари ўғли – кичик Николас Мадуро ҳам борлиги айтилди.

Кейин АҚШ Давлат котиби Марко Рубио Вашингтон томонидан Венесуэла президенти Николас Мадуронинг қўлга олиниши ортидан Куба ҳукуматини ҳам “улкан муаммо” деб атаган.