Трамп мақсадсиз ва кўп йиллик можарога йўл қўймайди – Вэнс

АҚШ вице-президенти Жей Ди Венс Эронга қарши операциянинг асосий мақсади Теҳроннинг ядровий қуролга интилишига барҳам бериш эканини айтди. Бу ҳақда у бугун, 3 март куни “Fox News” телеканалига берган интервюсида сўз очди.

Унинг айтишича, операция Эроннинг фикрлаш тарзини ўзгартиришга қаратилган бўлиб, Теҳрон ҳеч қачон ядровий қурол яратмаслик бўйича узоқ муддатли мажбуриятни олиши керак. Вэнснинг сўзларига кўра, АҚШ Президенти Дональд Трамп ўтган йили ўтказилган операция орқали Эроннинг учта асосий ядровий иншоотини нишонга олиб, мамлакатнинг ядровий қурол яратиш имкониятини сезиларли даражада чеклаган.

“Биз уларни анча орқага сурдик. Президент Эрон ҳеч қачон ядровий қурол яратмаслиги бўйича мустаҳкам ва узоқ муддатли келишувга эришишни истайди”, деди вице-президент.

Вэнснинг айтишича, АҚШ қарийб бир йил давомида Эрон билан музокаралар олиб борган, бироқ Теҳрон ўз позициясини ўзгартирмаган. Шундан сўнг Трамп Эрон режимининг ёндашувини тубдан ўзгартириш зарур деган хулосага келган. Шунингдек, у ҳозирги операция узоқ йилларга чўзилмаслигини таъкидлаб, АҚШнинг аниқ мақсади борлигини билдирди.

“Дональд Трамп мақсадсиз ва кўп йиллик можарога йўл қўймайди. Мақсад шуки, Эрон ядровий қуролга эга бўла олмаслиги ва узоқ муддатли мажбуриятларни бажариши, ҳеч қачон ядровий салоҳиятини тиклашга уринмаслиги керак”, дейди Вэнс.

Эслатиб ўтамиз, аввалроқ АҚШ Президенти Дональд Трамп Саудия Арабистонининг Ар-Риёд шаҳридаги АҚШ элчихонасига учувчисиз аппаратлар орқали амалга оширилган ҳужумга жавоб қайтарилишини маълум қилганди.

АҚШ–Исроил–Эрон уруши

Кеча, 28 февраль куни Исроил кутилмаган вақтда Эронга қарата ҳаводан зарбалар йўллади. Ушбу зарбалар Эроннинг муҳим объектлари – Президент қароргоҳи, давлат идоралари ва ядро иншоотларига теккани иддао қилинмоқда. Эроннинг “Mehr” ахборот агентлиги Теҳрондаги Эрон разведка биносига ҳам ҳужум қилинганини ёзган. Дастлабки манбаларга кўра, Эронга ўттиздан ортиқ ракеталар йўлланган бўлиши мумкин.

Орадан бироз вақт ўтиб Исроил Мудофаа кучлари Эронга ҳужумни расман тасдиқлаган. Шунингдек, Мудофаа вазирлиги Исроил фуқароларидан хавфсиз жойга яширинишни сўраган. Мамлакатда шошилинч равишда фавқулодда ҳолат эълон қилинган.

Шу орада АҚШ Президенти Дональд Трамп Эрон бўйича операциялар ҳақида 8 дақиқалик баёнот берган ва унда Эронга қилинган ҳужумда АҚШнинг иштирок этганини тасдиқлаган. Унинг қайд этишича, Эронга қилинган ҳарбий опреациялар Америка халқини ҳимоя қилиш учун амалга оширилмоқда. У ўз баёнотида эронликларни амалдаги тузумни ағдаришга чақирган. Трамп Эрон ҳарбий хизматчиларига таслим бўлишни ва бунинг эвазига “иммунитет” олишни таклиф қилди ёки “муқаррар ўлим”ни танлашлари мумкинлигини айтган.

Қолаверса, барча воқеаларни бир четдан кузатиб турган Эрон собиқ валиаҳд шаҳзодаси Ризо Паҳлавий ҳам Эрон халқига мурожаат қилиб, мамлакат учун ҳал қилувчи лаҳзалар келганини таъкидлаган. Шунингдек, у бу сўнгги жанг эканини ва унда Эрон халқи Ислом Республикаси тузуми устидан ғалаба қозонишини таъкидлаган.

Орадан кўп вақт ўтмай энди Эрон Исроил давлати ҳудудига қарата зарба йўллашни бошлади.

Исроил Бош вазири Биньямин Нетаньяху ҳам ҳужумларни тасдиқлаб, баёнот берган. Унга кўра, Исроил ва АҚШнинг Эронга қарши қўшма операцияси Эрон террор режими келтириб чиқараётган таҳдидни бартараф этишга қаратилган. Нетаньяху махсус мурожаатида сўнгги 47 йил давомида Эрон раҳбарияти Исроил ва АҚШга қарши очиқ таҳдидлар қилган ҳамда минтақада зўравонлик сиёсатини юритганини айтган.

Аввалроқ, Эрон давлат телевидениеси Хоманаий Исроил ва АҚШ томонидан ўлдирилганини хабар қилган эди. Эроннинг “Tasnim” ахборот агентлиги маълумотларига кўра, у кеча, 28 февраль куни эрталаб ўз ишхонасида ўлдирилган. Оятуллоҳнинг вафоти муносабати билан мамлакат бўйлаб 40 кунлик умумхалқ мотами ва 7 кунлик умумхалқ дам олиш кунлари эълон қилинди.

Шунингдек, Эрон ҳудудига уюштирилган ҳужум чоғида Оятуллоҳнинг оила аъзоларидан тўрт киши – қизи, куёви, набираси ва келинларидан бири ҳам ҳалок бўлган.

Қайд этиш жоиз, Эрон Ислом инқилоби қўриқчилари корпуси Ислом Республикаси Олий раҳбари Оятуллоҳ Али Хоманаийнинг вафоти тасдиқланганидан сўнг, мамлакат “Қуролли кучлари тарихидаги энг шиддатли ҳужум операцияси” бошланганини маълум қилганди.

Шундан сўнг, Эрон Ислом инқилоби қўриқчилари корпуси мамлакат Исроил ва АҚШга қарши янги ҳужумлар бошланганини эълон қилди.