Трамп телефон қўнғироғи билан Таиланд-Камбоджа низосини тўхтатмоқчи

Бугун, 10 декабрь куни Таиланд ва Камбоджа ўртасидаги урушнинг учинчи куни давом этмоқда. Доналъд Трамп можарога барҳам бериш учун икки давлат раҳбарларига телефон орқали мурожаат қилишини маълум қилди. Бу ҳақда Трамп кеча, 9 декабрь куни Пенсильваниядаги митингда айтди.

Маълум қилинишича, 9 декабрь куни Таиланд Ташқи ишлар вазири журналистларга берган интервьюсида чегарадаги можаро бўйича музокаралар ўтказиш учун “ҳеч қандай имконият кўрмаётганини” ва учинчи томон воситачилиги ҳам самара бермаслигини маълум қилди. Камбоджа Бош вазирининг бош маслаҳатчиси Хун Манет эса мамлакат “исталган вақтда музокара қилишга тайёр” эканини билдирди.

9 декабрь куни Пенсильванияда митинг ўтказган Трамп Жануби-шарқий Осиёда авж олган можарони тўхтатишдан олдин, ўзи ёрдам берган бошқа давлатлар ўртасидаги кескинликларни эсга олди. У Покистон-Ҳиндистон, Исроил-Эрон ўртасидаги уруш хавфларини юмшатишда муҳим роль ўйнаганини алоҳида келтириб ўтди. 

“Мен буни “Камбоджа-Таиланд” можароси, деб аташни ёқтирмайман. Бу бугун бошланди ва эртага мен қўнғироқ қилишим керак бўлади. Телефон қилиб, иккита жуда кучли давлат, Таиланд ва Камбоджа ўртасидаги урушни тўхтатаман, деб ким айта олади?”,  деди Трамп.

Трамп аввал ҳам ҳар икки давлат раҳбарлари билан суҳбатлашган. Июль ойидаги тўқнашувлар камида 48 кишининг ҳаётига зомин бўлган ва икки давлат ўртасидаги сўнгги йилларда кузатилган энг катта можаро сифатида баҳоланганди. Ўшанда АҚШ президенти Дональд Трамп Осиёдаги қўшни давлатлар ўртасидаги беш кунлик июль жангларини тўхтатишда воситачилик қилганди. 

Маълумот ўрнида, Таиланднинг ўтган ой октябрь саммитида келишилган деэскалация чораларини бекор қилганидан сўнг вазият кескинлашган. Бангкокнинг маълум қилишича, таиландлик аскар Камбоджа томонидан қўйилган янги мина портлаши оқибатида жароҳатланган, Камбоджа бу айбловни рад этган. Шундан сўнг ҳар икки давлат чегарага яқин ҳудудлардан юз минглаб одамларни эвакуация қилган. 

Камбоджа Мудофаа вазирлиги 8 декабрдан бери тўққиз нафар тинч аҳоли ҳалок бўлгани, 20 нафари оғир яралангани ҳақида маълум қилди. Таиланд эса тўрт нафар аскари ҳалок бўлганини, 68 нафари яраланганини билдирди.

Таиланд мақсадлардан бири сифатида “қўшни давлатнинг ҳужум уюштириш қобилиятини йўқотиш” эканини очиқ айтди. 8 декабрь куни юқори мартабали генерал армиянинг мақсади “Камбоджанинг ҳарбий салоҳиятини узоқ муддатга заифлаштириш” эканини таъкидлаган.

9 декабрь ярим тунда Камбоджа Мудофаа вазирлиги эса ўз қўшинлари фақат мудофаа чораларини кўришга мажбур бўлаётганини айтиб, Таиландни “тинч аҳоли яшайдиган ҳудудларни артиллерия билан шафқатсиз нишонга олишда” айблади. Бангкок бу айбловларни рад этган.

Эслатиб ўтамиз, 8 декабрь куни Таиланд ва Камбоджа ўртасида тўқнашув бошлангани ҳақида хабар берилганди.