Трампнинг одами Лукашенкога оздирадиган дори тавсия қилди

АҚШ Президенти Дональд Трампнинг Беларусь бўйича махсус вакили Жон Коул Минскка ташрифлари ва Александр Лукашенко билан олиб борган музокаралари чоғида унга вазн ташлаш учун мўлжалланган дори воситаларини қабул қилишни таклиф қилган. Бу ҳақда манбасига таяниб, “The Wall Street Journal” (WSJ) хабар берди.

WSJ суҳбатдошининг айтишича, учрашувлардан бири давомида бўлган кечки овқат пайтида Лукашенко апрель ойидаги охирги учрашувдан бери Коул анча озганини қайд этган. Коул бунга жавобан ҳазил тариқасида вазн камайтириш учун мўлжалланган “Zepbound” номли препаратни қабул қилаётганини айтган.

Нашр ёзишича, кечки овқат давомида санкцияларни юмшатиш масаласи ҳам муҳокама қилинган. Суҳбат асносида Лукашенко Коулдан:

“Сиз озиб кетдингизми?” деб сўраган.

“Ҳа”, деб жавоб берган Коул ва буни “Zepbound” қабул қилиши билан изоҳлаган. Шунингдек, Коул Лукашенкога ушбу препарат ишлаб чиқарувчиси – Eli Lilly компаниясининг брошюрасини ҳам топширган.

WSJ маълумотларига кўра, бу препарат ҳақидаги суҳбат сиёсатчилар ўртасида илк бор кўтарилмаган: Лукашенко баҳорда Коулнинг Беларусга ташрифи чоғида ҳам вазн камайтиришга мўлжалланган дориларга қизиқиш билдирган. Манбанинг таъкидлашича, америкалик вакил Лукашенкога вазн камайтириш бўйича чоралар кўришни қатъий тавсия қилган.

Шу билан бирга, Лукашенко хусусий тарзда Коулга АҚШдан кўпроқ Boeing самолётларини сотиб олишни таклиф қилган, бироқ бунда калийли ўғитлар ишлаб чиқарувчиларига нисбатан санкциялар бекор қилиниши шарт қилиб қўйилган.

WSJ ёзишича, Коул ва бошқа америкалик музокарачилар бундай келишув америкалик фермерлар учун фойдали бўлиши мумкин, деган хулосага келган. Эвазига Минскдан кўплаб маҳбусларни озод қилиш талаб этилган.

Декабрь ойи ўрталарига келиб, Беларусь томони 123 нафар маҳбусни озод қилган. Улар орасида Нобель тинчлик мукофоти лауреати, “Весна” инсон ҳуқуқлари маркази асосчиси ва раҳбари Алесь Беляцкий, мухолифат вакили Мария Колесникова ҳамда Лукашенконинг сайловлардаги собиқ рақиби Виктор Бабарико ҳам бор. Шундан сўнг АҚШ Молия вазирлиги Беларусь ЯИМининг тахминан 4 фоизини ташкил этувчи учта калий компаниясига нисбатан санкцияларни юмшатган.

Бироқ кейинчалик, газетанинг эслатишича, Лукашенко Беларусь парламентида сўзлаган нутқида Минск аллақачон Россия самолётларини сотиб олиш бўйича келишувга эришганини маълум қилган.

Кейинроқ Коул яқин ойларда Беларусь томонидан яна тахминан 1 минг нафар маҳбус озод қилиниши мумкинлигини айтган. Унинг фикрича, бундай ҳолатда Минскка нисбатан жорий этилган санкцияларнинг аксариятини бекор қилиш мумкин бўлади.