UEFA “Бенфика”ни жазолади

UEFA Португалиянинг “Бенфика” клубини Амстердамда “Аякс”га қарши бўлиб ўтган сафар учрашувида мухлисларнинг пиротехника воситаларини ишлатиши туфайли жазолади. Клубга навбатдаги Еврокубок сафар учрашуви учун чипталарни сотиш тақиқланди ва 20 000 евро миқдорида жарима солинди. Бу ҳақда “Footboom” нашри хабар берди.

“Бенфика” жамоаси 2025 йил 5 март куни мухлислари ўз уйида “Барселона”га қарши ўйинда шундай қоидабузарлик қилган ва клуб 35 000 евро жарима тўлаган эди. Олдинги жазоларга қарамай, “Бенфика” мухлислари “Аякс” билан ўйинда яна пиротехника ишлатишдан ўзини тия олмади. Натижада, “Бенфика” Европадаги навбатдаги сафар ўйини мухлисларнинг фаол қўллаб-қувватловисиз ўтказилиши керак бўлади. Энди жамоа 2026 йил 21 январда Туринда “Ювентус”га қарши ўйинда мухлисларсиз иштирок этади. 

UEFA шунингдек, “Бенфика” мухлислари икки йил давомида яна қоидаларни бузса, қўшимча жазо билан дуч келиши белгилаган. 

Маълумот учун, “Бенфика” ҳозирда Чемпионлар лигасида 30-ўринни эгаллаб турибди. Жамоа ортда қолган 5 турдан сўнг 3 очко жамғарган.

Эслатиб ўтамиз, аввалроқ UEFA жорий йилнинг октябрь ойида Лондонда “Арсенал”га қарши бўлиб ўтган Чемпионлар лигаси учрашувида “Атлетико Мадрид” мухлисларининг “ирқчилик ва камситувчи хатти-ҳаракатлари” сабаб клубга 30 минг евро жарима қўллаган эди.