Улар мендан 7 та чемпионликни тортиб олди – Перес  

“Реал Мадрид” президенти Флорентино Перес ҳакамлар қарорлари сабаб мадридликлар бу мавсумда кўплаб очколардан маҳрум бўлганини айтди. Бу ҳақда Перес журналистлар билан ўтказилган матбуот анжуманида сўз очди.

79 ёшли функционернинг таъкидлашича, унинг даврида мадридликлар аслида ҳозиргидан анча кўпроқ Ла Лига чемпионлигини қўлга киритиши керак эди.

“Қандай қилиб жаҳлим чиқмаслиги мумкин? Мен етти марта Ла Лига чемпионлигини қўлга киритдим, аммо бу кўрсаткич 14 та бўлиши керак эди. Улар мендан еттита чемпионликни тортиб олишди. Бу мавсумнинг ўзида эса биздан 18 очко олиб қўйишди. “Режим зиёлилари” бизга зарар етказмоқда”, дейди Перес матбуот анжуманида.

Шунингдек, Перес Ла Лигани Негрера ишида айблади ва уларга қарши 500 саҳифали далиллар борлигини айтиб, уни UEFA’га бериш билан таҳдид қилди.

“Бизнинг яна бир абадий душманимиз бор – Ла Лига. Биз курашамиз. Мен ҳамма билан курашаман. Негрера ишидаги тизимли коррупция? Буни шунчаки унутишимиз керак, деб қандай айта оласиз? Биз 500 саҳифали ҳужжат тайёрлаяпмиз, уни мусобақа тугагандан сўнг UEFA’га юбораман. Мен улар билан аллақачон гаплашдим. Бу жаҳон футболи тарихида ҳеч қачон содир бўлмаган. Бу тарихдаги энг катта коррупция иши”, дейди Перес.

Испания чемпионатининг 35-туридан сўнг “Реал Мадрид” 77 очко билан турнир жадвалида иккинчи ўринда бормоқда. Мадридликлар жорий йилнинг 10 май куни Барселонада учраган мағлубиятдан сўнг муддатдан аввал чемпионликни каталонияликларга топширган эди.

Маълумот учун, Перес 2000–2006 йилларда “Реал Мадрид” президенти сифатида фаолият юритган. У 2009 йилда яна ушбу лавозимга қайтган.

Эслатиб ўтамиз, аввалроқ Перес жорий йилда “Реал Мадрид” президентлик сайловини ўтказилишини маълум қилганди.