Вашингтон полицияси АҚШда Алиевга қарши бўлган намойиш ҳақида изоҳ берди (видео)

Аввалроқ, АҚШнинг Вашингтон шаҳрида “Тингчлик кенгаши”нинг биринчи йиғилишига борган Озарбайжон Президенти Илҳом Алиевнинг меҳмонхонаси қаршисида намойиш ўтказилгани ҳақида хабар берилган эди. Кеча, 20 февраль куни АҚШнинг Метрополитан полиция бўлими (МПБ) мазкур ҳолат юзасидан ТАССга изоҳ берди.

Полиция бўлими вакили Махета Уотсон МПБ ушбу ҳодисадан хабардорлигини ва намойиш вақтида воқеа жойида АҚШ Махфий хизмати ходимлари ҳам бўлганини тасдиқлаган. Шунингдек, ҳозирча воқеага алоқадор ҳеч ким қўлга олинмаганини ҳам айтган.

Бундан ташқари, Уотсон ушбу масала АҚШ Махфий хизмати томонидан Давлат департаментига йўналтирилганини қўшимча қилган. 

Озарбайжоннинг АҚШдаги элчихонаси Президент Алиев тунаган “Waldorf Astoria” меҳмонхонаси қаршисида бир гуруҳ намойишчилар провокацион ҳаракат қилганини билдирган. Президентга тегишли кортеж меҳмонхона томон яқинлашганда, намойишчилар тақиқланган ҳудудга кириб, машинага ҳужум қилишга уринган. Оқибатда Президентнинг Қўриқлаш хизмати тезлик билан вазиятни бартараф қилишга мажбур бўлган. АҚШ Махфий хизмати ҳам меҳмонхона ҳудуди расмий хавфсизлик зонасига киришини тасдиқлаган.

“The Washington Post” нашрига кўра, ҳодиса оқибатида камида 5 киши жароҳат олган. 

Эслатиб ўтамиз, намойишчилар Озарбайжонда сақланаётган сиёсий маҳбусларга, хусусан, Озарбайжон Халқ фронти партияси раиси Али Каримлига озодлик берилишини талаб қилиб, норозилик билдирган.  Шунингдек, улар қўлларида овоз кучайтиргич билан бир неча маротаба “Сиёсий маҳбусларга озодлик”, “Диктатор” деб бақирган. Шундан сўнг уларга нисбатан Президент қўриқлов хизмати тарафидан куч ишлатилиб, жароҳат етказилган.