Вучич Хорватия ва Албания ҳужумга тайёрланаётганини айтди

Сербия Президенти Александр Вучич Хорватия, Албания ва ўзини мустақил деб эълон қилган Косово Республикаси унинг мамлакатига ҳужум қилишга тайёргарлик кўраётганини маълум қилди. Бу ҳақда у ушбу томонлар ўртасида 2025 йил 18 март куни Тиранада имзоланган мудофаа соҳасидаги ҳамкорлик тўғрисидаги уч томонлама декларацияга таяниб, RTS телеканалига берган интервьюсида сўз очди. 

Вучичнинг сўзларига кўра, ушбу ҳужжат ҳарбий алоқаларни мустаҳкамлаш ва Сербияга қарши иттифоқ тузишга қаратилган.

“Улар бизга ҳужум қилиш учун иттифоқ тузмоқдалар. Улар Россия ва Европа ўртасидаги можаронинг кучайишини ҳамда Яқин Шарқда каттароқ уруш бошланадиган пайтни кутишмоқда. Улар бутун дунёдаги бетартиблик бунга имкон берадиган вақтни пойлашяпти”, дейди Сербия президенти.

Вучич, шунингдек, Загреб сўнгги бир ярим йил давомида “Сербияга путур етказишга ва унинг ички ишларига аралашишга уринаётганини” қўшимча қилган.

Мудофаа салоҳияти ҳақида гапирар экан, давлат раҳбари Сербиянинг ихтиёрида 400 километргача масофага учувчи Хитойнинг гипертовушли “ҳаво-ер” тоифасидаги ракеталари борлигини ва уларни энг илғор қурол тизимларидан бири эканини айтган. Шу билан бирга, у Белград ҳарбий нейтраллик сиёсатини сақлаб қолган ҳолда НАТО билан яхши муносабатда эканини таъкидлаган.

Вучич жорий йилнинг 7 март куни миллий ривожланиш стратегиясини тақдим этар экан дунёда янги ва жиддийроқ ҳарбий можаролар муқаррар эканидан огоҳлантирган. 2025 йил октабр ойида эса у: "Ҳамма урушга тайёрланяпти ва гап фақат ким қайси томонда эканлигида”, дея қайд этган.

Эслатиб ўтамиз, аввалроқ Александр Вучич “Pink” телеканали эфирида Европадаги барча давлатлар Россия билан эҳтимолий урушга тайёрланаётганини айтган эди.