Яқин Шарқда уруш очган Трамп Нобель мукофотига қизиқмай қўйди

АҚШ Президенти Дональд Трамп Нобель тинчлик мукофотини олиш масаласига энди қизиқмаслигини билдирди. Бу ҳақда у “Washington Examiner” нашрига берган интервьюсида сўз очди.

Журналистлар Трампдан Эронга қарши ҳарбий операция Нобель қўмитаси томонидан тан олиниши мумкинми, деб сўрашган. 

“Билмайман. Мен қизиқмайман”, дея жавоб берган АҚШ Президенти.

Дональд Трамп бу масала бошқа давлат раҳбарлари билан учрашувларда кўтарилганми, деган саволга ҳам рад жавобини берган.

“Йўқ, мен Нобель мукофоти ҳақида гапиришни истамайман”, деган у.

Бир муддат олдин Трамп бир неча бор Нобель тинчлик мукофотига лойиқ эканини таъкидлаган эди. Бироқ, 2025 йилда бу мукофот венесуэлалик мухолиф сиёсатчи Мария Корина Мачадога берилган. Кейинчалик у Трамп билан учрашув чоғида Нобель мукофоти медалини унга топшириб, Трамп бу мукофотга лойиқ эканини айтган.

Малумот учун, жорий йилнинг 28 февраль куни АҚШ ва Исроил Эрон ҳудудидаги бир қатор биноларга зарба беришни бошлади. Ҳужумлар оқибатида инфратузилмалар зарар кўрган ва тинч аҳоли ҳалок бўлган. Зарбалар оқибатида Эроннинг олий раҳбари Оятуллоҳ Али Хоманаий ҳалок бўлган. Шундан сўнг мамлакатда 40 кунлик мотам эълон қилинган. Эрон эса бунга жавобан Исроил ҳудудига ҳамда Яқин Шарқдаги АҚШ ҳарбий объектларига зарбалар бермоқда.

Эслатиб ўтамиз, аввалроқ Дональд Трамп Кентукки штатидаги Хеброн шаҳрида ўтказилган митингда АҚШ Эронга қарши урушда биринчи соатнинг ўзида ғалаба қозонганини айтганди.