ЕИ Исроилга санкция жорий қилмоқчи

Европа Иттифоқи Исроилга нисбатан санкциялар жорий этиш имкониятини кўриб чиқмоқда. Бу ҳақда “Haaretz” хабар берди.

Маълумотларга кўра, Европа Иттифоқи Исроилдаги айрим жисмоний ва юридик шахслар Россияга ноқонуний савдода ёрдам берган бўлиши мумкин, деб ҳисобламоқда. Гап Россиянинг “соя флоти”га тегишли кемалар орқали олиб келинган, Украинадан ўғирланган дон ҳақида бормоқда.

Европа комиссиясининг расмий вакили Ануар аль-Анунининг айтишича, бундай кемалардан бири Исроилнинг Ҳайфа портида юк туширишга рухсат олган. Бу эса Украина томонидан олдиндан билдирилган огоҳлантиришларга қарамай содир бўлган.

Унинг таъкидлашича, Европа Иттифоқи Россиянинг ноқонуний ҳарбий ҳаракатларини молиялаштиришга хизмат қилувчи ва санкцияларни четлаб ўтишга ёрдам берувчи ҳар қандай фаолиятни қоралайди. Зарурат туғилса, учинчи давлатлардаги шахс ва компаниялар ҳам санкция рўйхатига киритилиши мумкин.

Шу билан бирга, ЕИ Исроил ҳукуматидан бу ҳолат юзасидан қўшимча маълумот ҳам сўраган.

Аввалроқ, ОАВлар Исроилга Panormitis номли кема келгани ҳақида ёзган эди. Унда 6 минг тоннадан ортиқ буғдой ва 19 минг тонна арпа бўлган ва бу юк Украинадан олиб чиқилгани гумон қилинмоқда. Шунингдек, 2026 йил бошидан буён Исроилда камида тўртта шундай юк туширилгани айтилмоқда.

Украина бу ҳолат юзасидан Исроил элчисини чақирган. Исроил Ташқи ишлар вазирлиги эса ҳозирча бу айбловларни тасдиқловчи далиллар тақдим этилмаганини билдирган.

Эслатиб ўтамиз, аввалроқ Европа Иттифоқи Россияга қарши санкцияларнинг 20-пакети доирасида Ўзбекистоннинг пахта целлюлозаси ишлаб чиқариш билан шуғулланувчи икки компаниясига нисбатан чекловлар киритгани ҳақида хабар берилган эди.