Юн Сок Ёль халқдан узр сўради

Жанубий Корея собиқ президенти Юн Сок Ёль ҳарбий ҳолат жорий этилгани ортидан юзага келган азоб-уқубатлар учун халқдан узр сўради. Бироқ у 2024 йил 3 декабрь кунги қарорини мамлакатни “қутқариш” мақсадида қабул қилганини яна бир бор таъкидлади. Бу ҳақда “Yonhap” хабар берди.

Юн аввалроқ Сеул Марказий туман суди томонидан қўзғолон етакчилигида айбдор деб топилиб, умрбод қамоқ жазосига ҳукм қилинган эди. Суд унинг ҳарбий ҳолат пайтида Миллий Ассамблеяга қўшин юбориши конституциявий орган фаолиятини фалажлашга қаратилган, деган хулосага келган.

Собиқ лидер эса парламентга ҳарбийлар юборилгани қўзғолон сифатида талқин этилишини “қабул қилиш қийин” эканини билдирган. У қарори фақат давлат ва халқ манфаатларини кўзлаб қабул қилинганини, бироқ бу жараёнда юзага келган тушкунлик ва изтироблар учун масъулиятни зиммасига олишини қайд этган.

Айбланувчи, шунингдек, апелляция бериш масаласига ҳам шубҳа билан қараётганини айтиб, суд мустақиллигига ишонч йўқлигини урғулаган. Унинг адвокатлари эса якуний қарор маслаҳатлашувдан сўнг эълон қилинишини маълум қилган.

Юн ҳарбий ҳолатни “давлатга қарши кучлар”ни йўқотиш зарурати билан изоҳлаган. Бироқ парламент қароридан сўнг тартиб атиги олти соат ичида бекор қилинган. Махсус прокурор бошчилигидаги гуруҳ собиқ президентга нисбатан ўлим жазосини сўраган ва ҳукм устидан шикоят қилишини билдирган.

Эслатиб ўтамиз, Юн Сок Ёль парламент спикерини ҳамда ўша пайтдаги ҳукмрон партия ва асосий мухолифат партияси раҳбарларини ҳибсга олишни ташкил этганликда айблангани ҳақида хабар берилган эди.