Зеленский билан учрашишдан маъно йўқ – Путин (видео)

Россия Президенти Владимир Путин Украина Президенти Владимир Зеленскийнинг юзма-юз учрашув ўтказиш ҳақидаги таклифини рад этди. Путин бу ҳақда Санкт-Петербург халқаро иқтисодий форумида маълум қилди.

Унинг таъкидлашича, ҳозирча бундай мулоқотдан маъно кўрмаяпти ва уруш фақат Москва ўз олдига қўйган мақсадларга эришганидан кейингина якунланади. Россия раҳбари Зеленскийнинг урушни тугатиш масаласини шахсан муҳокама қилиш ҳақидаги мурожаатига жавоб берар экан, Украина Президентининг очиқ мактубини носамимий деб баҳолаган. 

“Бу мактубда анча қўпол иборалар бор. Бу юзма-юз учрашув учун шароит яратиш мақсадидами ёки аксинча, бундай учрашув бўлмаслиги учунми? Менимча, иккинчиси”, деган Путин. 

Бунга жавобан Зеленский Кремлнинг позицияси Россиянинг урушни тугатишга тайёр эмаслигини кўрсатишини айтган.

“Россия томони яна уруш йўлини танламоқда. Бу заиф жавоб. Ўйлайманки, дунёдаги кўплаб одамлар бу жавобдан ҳафсаласи пир бўлади”, деган Украина Президенти ўзининг видеомурожаатида. 

Россия ва Украина ўртасидаги уруш бешинчи йилига кирган бўлса-да, тинчлик музокаралари амалда боши берк кўчага кириб қолган. Манбаларнинг таъкидлашича, Москва назоратига олган ҳудудларни сақлаб қолишни талаб қилмоқда, Киев эса, бундай шартларни қабул қилишдан бош тортмоқда. 

Путин форумдаги чиқишида Россия ҳарбий амалиётларни фақат белгиланган мақсадларга эришилгач тўхтатишини яна бир бор айтган. 

“Ҳарбий ҳаракатлар, албатта бир кун келиб тугайди. Бироқ бу – биз ўз олдимизга қўйган мақсадларга эришганимиздан кейин содир бўлади”, деб таъкидлаган у. 

Шунингдек, Россия Президенти мамлакат иқтисодиёти уруш харажатлари ва Ғарб санкцияларининг босими остида инқирозга юз тутгани ҳақидаги даъволарни ҳам рад этган. Унинг сўзларига кўра, Россия “суверен иқтисодиёт” моделини ривожлантирмоқда. 
Бироқ расмий маълумотларга кўра, Россия иқтисодиёти 2026 йилнинг биринчи чорагида 0,2 фоизга қисқарган. Бу сўнгги уч йил ичидаги илк чораклик пасайиш бўлиб, уруш ва санкциялар таъсири иқтисодиётда сезилаётганини кўрсатмоқда.

Эслатиб ўтамиз, аввалроқ Украина Президенти Владимир Зеленский Россия Президенти Владимир Путинга очиқ мактуб йўллаб, тўғридан тўғри музокаралар жараёнини бошлаш ва давлат раҳбарларининг шахсий учрашувини ўтказишни таклиф қилган эди.