Зеленский Эрондаги уруш Украинага қурол етказишга таъсир қилишидан хавотирда

Яқин Шарқда узоқ давом этадиган уруш Украинага қурол етказиб беришга таъсир қилиши мумкин. Бу ҳақда Украина Президенти Владимир Зеленский “Deutsche Welle” нашрига берган интервьюсида айтиб ўтди. 

Зеленскийнинг таъкидлашича, ҳозирча Украина иттифоқчилардан келаётган қурол етказиб бериш ҳажмида камайиш кузатилмаяпти.

“Ҳозирча таъсирни кўраётганимиз йўқ. Кутганимиздек бўлган етказиб беришлар камаймади, лекин фақат бир кун ўтди, шунинг учун хулоса чиқариш эрта”, деган у.

Шу билан бирга, Президент Яқин Шарқда узоқ давом этадиган ҳарбий можаро юзага келса, хавфлар ортиши мумкинлигини тан олган. У бундай ҳолат қурол етказиб беришга таъсир қилишига ишонишини билдирган.

Зеленский, шунингдек, Украина халқаро вазият мураккаблашган тақдирда ҳам ўз мудофаа ишлаб чиқаришини барқарор молиялаштириш устида ишлаётганини айтган. Унинг сўзларига кўра, мамлакат Европа Иттифоқи томонидан ажратилиши режалаштирилган 90 миллиард евро миқдоридаги ёрдамнинг блокланиб қолмаслиги учун ҳаракат қилмоқда.

Яқин Шарқда, жумладан Эрондаги уруш Россия ва унинг Президенти Владимир Путин учун ҳам сиёсий жиҳатдан оқибатларга олиб келиши мумкин. Зеленскийнинг фикрича, Россиянинг минтақадаги таъсири чекланган, чунки унинг ҳарбий ресурслари деярли тўлиқ Украинадаги урушга йўналтирилган.

Президент, шунингдек, Россиянинг Сурия сиёсати ҳақида гапириб, Суриядаги Башар Асад режимини қўллаб-қувватлашда Москва етарли куч кўрсата олмаганини таъкидлаган.

Зеленскийнинг фикрича, Хитойнинг можарони тугатиш жараёнига жалб этилиши муҳим. Унинг айтишича, Пекинни урушни давом эттириш эмас, балки уни тўхтатишга ҳисса қўшиш жараёнига қўшиш лозим. Президент Хитой раҳбари қурол, икки томонлама мақсадли товарлар ва бошқа соҳаларга таъсир кўрсатиши мумкинлигини айтган.