Зеленский Трамп билан учрашиш учун АҚШга борди

Кеча, 27 декабрь куни Украина Президенти Владимир Зеленский АҚШга ташриф буюрди. Бу ҳақда “Euronews” нашри мухбири хабар берди.

Украина етакчиси АҚШ Президенти Дональд Трамп билан бугун, 28 декабрда учрашади. Оқ уй маълумотига кўра, икки давлат раҳбарининг учрашуви Тошкент вақти билан соат 19:00 да Флорида штатининг Палм-Бич шаҳрида бўлиб ўтади.

Украина Ташқи ишлар вазири ўринбосари Сергей Кислица ҳам Х ижтимоий тармоғида “Хайрли кеч, Флорида” деган қисқа ёзув қолдирган.

Аввалроқ, Зеленский Трамп билан музокараларда хавфсизлик кафолатлари, уларнинг муддати, шунингдек, мамлакатни тиклаш учун иқтисодий ёрдам масалаларини муҳокама қилишни режалаштираётганини билдирган эди.

Трамп билан бўладиган учрашув арафасида Украина Президенти Канадага бориб, у ерда Бош вазир Марк Карни билан учрашди, шунингдек, Европа давлатлари етакчилари билан ҳам мулоқотлар ўтказди.

“Бугунги суҳбат давомида ҳозир дипломатик йўналишда қандай ҳаракат қилаётганимизни муҳокама қилдик. Биргаликда энг муҳим устувор йўналишларни кўриб чиқдик. Украина кўрсатилаётган барча ёрдамни қадрлайди. Эртага Президент Трамп билан учрашувдан сўнг суҳбатни давом эттирамиз”, деган Зеленский.

У Украинага “ҳам фронтда, ҳам дипломатияда кучли позициялар зарурлигини” таъкидлаб, Канада ва Европа давлатларига қўллаб-қувватлов учун миннатдорлик билдирган. Марк Карни Украинага қўшимча 2,5 миллиард доллар миқдорида иқтисодий ёрдам ажратилишини эълон қилган.

Трамп Зеленский билан учрашув давомида тинчлик келишувига эришиш учун “яхши имкониятлар борлигини” айтган. Шу билан бирга, Оқ уй раҳбари Украинанинг 20 банддан иборат тинчлик режасига нисбатан совуққон муносабат билдирган.

Россия Президенти ёрдамчиси Юрий Ушаков эса украинлар ва европаликлар томонидан тинчлик режасига киритилаётган таклифлар “ижобий натижа бермайди”, деган фикрни билдирган.

Эслатиб ўтамиз, аввалроқ Украина Президенти Владимир Зеленский АҚШ етакчиси Дональд Трамп билан учрашув арафасида тинчлик музокараларидаги Украина учун аниқ “қизил чизиқлар”ни маълум қилганди. Зеленскийнинг сўзларига кўра, Украина учун “қизил чизиқлар” – ҳудудий масалалар, Запорожье АЭС ва хавфсизлик кафолатлари ҳисобланади.