Зеленский Трампдан 50 йиллик хавфсизлик кафолатларини сўради

Украина Президенти Владимир Зеленский бугун, 29 декабрь куни АҚШ Президенти Дональд Трампдан Украина учун узоқ муддатли – 30-50 йилгача бўлган хавфсизлик кафолатларини беришни сўраганини маълум қилди. 

Унинг айтишича, ҳозир томонлар 15 йиллик кафолатлар вариантини, кейинчалик уларни узайтириш имконияти билан, муҳокама қилмоқда.

“Мен унга айтдим: уруш бизда қарийб 15 йилдан бери давом этяпти, шунинг учун кафолатлар янада узоқ муддатли бўлишини жуда истаймиз. Биз 30-40-50 йиллик вариантни кўриб чиқишни хоҳлаймиз, дедим. Ана шунда бу Президент Трамп учун тарихий қарор бўлади. Президент эса: “Ўйлаб кўраман”, деди”, деди Зеленский.

Украина Президентининг қўшимча қилишича, мамлакатдаги ҳарбий ҳолат Киев хавфсизлик кафолатларини олмагунча бекор қилинмайди. Бу кафолатлар АҚШ Конгресси ва Украина парламенти томонидан қўллаб-қувватланиши керак. Унинг таъкидлашича, бундай кафолатларсиз тузилган сулҳ урушнинг якунланишини англатмайди. Кафолатлар мониторинг, ҳамкор давлатларнинг иштирокини ўз ичига олиши ва урушни тугатиш бўйича келишувлар билан бир вақтда тақдим этилиши лозим.

Зеленский Будапешт меморандуми ва Минск келишувлари “иш бермаганини” ҳам эслатди. Шунингдек, у Путин билан эҳтимолий учрашуви учун Украина таклиф этган тинчлик режаси АҚШ ва Европа давлатлари томонидан маъқулланиши шарт эканини билдирди.

Флоридада бўлиб ўтган Зеленский ва Трамп учрашувидан кейин Украина Президенти тинчлик режаси 90 фоизга, АҚШ томонидан хавфсизлик кафолатлари эса 100 фоизга келишилганини айтган эди. Бироқ бу кафолатларнинг мазмуни ҳозирча ошкор этилмаган.